Сінькевіч, Г. Узнагароды інтэлектуалам : у Магілёве ўшанавалі пераможцаў рэспубліканскай алімпіады па вучэбных прадметах / Ганна Сінькевіч // Настаўніцкая газета. — 2018. — 26 ліпеня. — С. 4.
У Магілёве ўшанавалі пераможцаў рэспубліканскай алімпіяды па вучэбных прадметах.
Урачыстае мерапрыемства аб’яднала лепшых навучэнцаў агульнаадукацыйных устаноў вобласці, іх бацькоў і педагогаў. Вітаючы прысутных падчас цырымоніі ўзнагароджання, намеснік старшыні аблвыканкама Андрэй Кунцэвіч адзначыў, што значныя дасягненні вучняў — паказчык якасці рэгіянальнай сістэмы адукацыі.
— Перамогі ў заключным этапе рэспублікай алімпіяды сталі магчымымі дзякуючы вашай стараннасці, працы педагогаў, клопату бацькоў, а таксама ўмовам, якія былі створаны дзяржавай для навучання. Менавіта вы будзеце вызначаць будучыню нашай краіны. Ад вас залежыць, якой стане Беларусь у найбліжэйшы час, — падкрэсліў Андрэй Міхайлавіч, пажадаўшы юнакам і дзяўчатам не спыняцца на дасягнутым, працягваць развівацца і ўпэўнена ісці па жыцці.
Прадстаўнікі ўлады ўручылі 74 пераможцам заключнага этапу рэспубліканскай алімпіяды ганаровыя дыпломы і каштоўныя падарункі. Адзначаны былі і бацькі навучэнцаў— яны атрымалі падзячныя лісты.
Адметна, што сёлета ў рэспубліканскай алімпіядзе па вучэбных прадметах прымала ўдзел звыш 900 навучэнцаў з усёй Магілёўшчыны. Найбольшую колькасць дыпломаў заваявалі навучэнцы Магілёва і Бабруйска. Сярод устаноў адукацыі лідарамі ў алімпіядным рэйтынгу на працягу апошніх некалькіх гадоў застаюцца абласныя ліцэі № 3 і № 1, Ліцэй Беларуска-Расійскага ўніверсітэта, гімназіі № 1 і № 2 Бабруйска, № 1 і № 2 Магілёва, а таксама гімназія Горак.