Сінькевіч, Г. Адданыя выбранай справе : [абласны конкурс прафесійнага майстэрства «Педагог дадатковай адукацыі»] / Ганна Сінькевіч // Настаўніцкая газета. — 2020. — 13 лютага. — С. 13.
Неверагодна творчыя прафесіяналы, якія шчыра любяць дзяцей і цалкам адданыя выбранай справе. Такія яны — удзельнікі абласнога конкурсу прафесійнага майстэрства “Педагог дадатковай адукацыі”, што надоечы завяршыўся на Магілёўшчыне.
Пераможца конкурсу педагог аб’яднання “Каларыт” Цэнтра дадатковай адукацыі дзяцей і моладзі Бабруйска Ю.В.Прохарава.
Традыцыйны конкурс праводзіцца штогод з мэтай выяўлення і распаўсюджвання перадавога вопыту ў сістэме дадатковай адукацыі, а таксама падтрымкі лепшых педагагічных работнікаў.
Яркія моманты конкурсу.
— Дадатковая адукацыя Магілёўшчыны сёння — гэта 38 навучальных устаноў. Гэта практычна 50 тысяч дзяцей, якія займаюцца ў 5 тысячах аб’яднанняў па інтарэсах. Навучэнцы маюць магчымасць рэалізаваць сябе ў разнастайных напрамках дзейнасці. Дапамагаюць ім у гэтым педагогі-прафесіяналы, якія штодзень працуюць над раскрыццём дзіцячых талентаў, — паведаміла намеснік начальніка аддзела выхаваўчай работы і аховы дзяцінства галоўнага ўпраўлення па адукацыі аблвыканкама А.В.Клімянкова.
Сёлета ўдзел у конкурсе прымалі 25 педагогаў. Канкурсанты праходзілі прафесійныя іспыты. У аргкамітэт яны прадстаўлялі відэаролікі заняткаў з навучэнцамі свайго аб’яднання па інтарэсах і майстар-класа па напрамку дзейнасці, прыклады ўласных метадычных распрацовак. Гэтыя заданні дазволілі журы ацаніць прафесійную кампетэнтнасць удзельнікаў, арыгінальнасць, эксклюзіўнасць іх майстэрства, узровень метадычнага забеспячэння адукацыйнага працэсу. Усе змаглі раскрыць свой прафесіяналізм не толькі як вузкія спецыялісты, якія добра валодаюць пэўным відам дзейнасці, але і як педагогі, дасканальна дасведчаныя ў тэхналогіях навучання дзяцей, раскрыцці іх творчых здольнасцей і асобасных інтарэсаў.
У фінал выйшлі 15 удзельнікаў. Варта назваць імёны гэтых педагогаў. Фіналістамі конкурсу сталі педагог аб’яднання “Свет харэаграфіі” Цэнтра творчасці дзяцей і моладзі “Крэчут” А.В.Антропенка, педагог аб’яднання “Шкатулачка” Клімавіцкага цэнтра дадатковай адукацы дзяцей і моладзі Н.В.Антоненка, педагог аб’яднання “Дамісолькі” Асіповіцкага раённага цэнтра творчасці дзяцей і моладзі Г.М.Бабчанок, харэограф узорнага харэаграфічнага ансамбля “Васілёк” Цэнтра дадатковай адукацыі дзяцей і моладзі “Росквіт” Бабруйска А.А.Галех, педагог аб’яднання “Прырода і фантазія” Горацкага раённага цэнтра творчасці дзяцей і моладзі А.У.Гогаль, педагог аб’яднання “Чароўная палітра” Цэнтра творчасці дзяцей і моладзі “Крынічка” Магілёва Л.Д.Крываногава, педагог аб’яднання “Чамучкі” шматпрофільнага цэнтра “Ветразь” Бялыніч С.В.Лазаронак, педагог аб’яднання “Каларыт” Цэнтра дадатковай адукацыі дзяцей і моладзі Бабруйска Ю.В.Прохарава, педагог аб’яднання “Калейдаскоп” Цэнтра творчасці Глуска С.М.Патапенка, педагог аб’яднання “Умелыя ручкі” Цэнтра творчасці дзяцей і моладзі “Агат” Магілёва А.В.Раманава, педагог аб’яднання “Я — вядучы!” шматпрофільнага цэнтра па рабоце з дзецьмі і моладдзю “Юнацтва” Магілёва А.А.Слесараў, педагог аб’яднання “Азбука мастака” Цэнтра дзіцячай творчасці Мсціслава А.У.Раманенка, педагог аб’яднання “Настрой” Касцюковіцкага раённага цэнтра дзіцячай творчасці А.М.Хрыпачова, педагог аб’яднання “Мы гаворым па-англійску” Слаўгарадскага раённага цэнтра дзіцячай творчасці А.М.Хрушчова, педагог аб’яднання “Вясёлкавы пэндзаль” Цэнтра творчасці “Эверэст” Магілёва Ю.М.Шпатаў.
Усе вышэйназваныя педагогі — несумненныя прафесіяналы. Выявіць сярод іх лепшага з лепшых дапамог шэраг фінальных конкурсных заданняў. Спачатку канкурсанты праходзілі псіхолага-педагагічнае тэсціраванне, а пасля выступалі з самапрэзентацыяй “Знаёмцеся — гэта я!”.
На сцэне педагогі раскрывалі свой асобасна-прафесійны вобраз, разнастайнасць талентаў, абазначалі педагагічнае крэда. Іх крэатыўныя, напоўненыя творчасцю і любоўю да сваёй прафесіі выступленні ўражвалі. Педагогі шчыра і заўзята расказвалі пра свае працоўныя будні, пра сваіх вучняў і іх дасягненні.
— Быць педагогам дадатковай адукацыі — гэта вялікая адказнасць. Адказнасць за тое, якімі вырастуць нашы дзеці. Каб быць добрым педагогам, трэба любіць тое, што робіш, а яшчэ — бязмежна любіць сваіх вучняў, — адзначыла ў сваім выступленні педагог аб’яднання “Мы гаворым па-англійску” Слаўгарадскага раённага цэнтра дзіцячай творчасці А.М.Хрушчова, і яе словы былі сугучныя выступленням астатніх канкурсантаў.
Раіцца і вызначаць пераможцаў судзейскай камісіі прыйшлося доўга, але прысутныя ў зале ў гэты час не сумавалі. Сваімі таленавітымі выступленнямі іх радавалі выхаванцы абласнога Цэнтра творчасці.
Па выніках конкурсу перамогу і ганаровае званне “Педагог дадатковай адукацыі” заслужана атрымала прадстаўніца Цэнтра дадатковай адукацыі дзяцей і моладзі Бабруйска Ю.В.Прохарава. Лаўрэатамі конкурсу сталі Л.Д.Крываногава з Цэнтра творчасці дзяцей і моладзі “Крынічка” Магілёва, А.А.Слесараў са шматпрофільнага цэнтра па рабоце з дзецьмі і моладдзю “Юнацтва” Магілёва і А.У.Гогаль з Горацкага раённага цэнтра творчасці дзяцей і моладзі. Астатніх фіналістаў адзначылі дыпломамі па намінацыях.
Ганна СІНЬКЕВІЧ.
Фота аўтара.