Карповіч, А. Мастацтва кіраваць музыкай : форум дырыжораў упершыню пройдзе ў Магілёве / Арына Карповіч // Звязда. — 2022. — 12 сакавіка. — С. 9.
Форум дырыжораў упершыню пройдзе ў Магілёве
У Магілёве ладзіцца культурна-асветніцкі праект «Форум дырыжораў» — мерапрыемства пройдзе першы раз. Удзел у ім прымаюць беларускія і расійскія дырыжоры. Адна з мэт форуму — абмен ведамі. Менавіта таму арганізатарамі запланавана правядзенне круглага стала, спікерам якога стане Эльвіра Тахірава — старшы выкладчык кафедры аркестравага дырыжыравання і інструментоўкі Беларускай дзяржаўнай акадэміі музыкі. Семінар-практыкум правядзе галоўны дырыжор рускага народнага аркестра Расійскай акадэміі музыкі імя Гнесіных «Душа Расіі» Уладзімір Шкуроўскі, а майстар-клас па дырыжыраванні дасць Віктар Акуловіч — прафесар Санкт-Пецярбургскай дзяржаўнай кансерваторыі імя М. А. Рымскага-Корсакава. Паслухаць акадэмічную музыку і сусветныя хіты можна будзе 17 і 18 сакавіка ў Магілёўскай абласной філармоніі.
Намеснік дырэктара Магілёўскай філармоніі Алёна Пруднікава расказала «Звяздзе», што ў Беларусі такога маштабнага форуму, які сабраў бы дырыжораў з Беларусі і Расіі, дагэтуль не ладзілася. У межах праекта ўпершыню быў арганізаваны рэспубліканскі конкурс аркестраў народных інструментаў імя народнага артыста Беларусі Л. Л. Іванова, заяўкі да ўдзелу дасылаліся анлайн. Зараз сябры журы, у склад якога ўвайшлі мастацкія кіраўнікі ўстаноў культуры, абіраюць пераможцу.
Галоўны дырыжор заслужанага калектыву Рэспублікі Беларусь аркестра народных інструментаў імя Іванова Дзяніс Чарта адзначыў, што на форуме будуць прадстаўлены ўсе рэгіёны Беларусі:
— Калі мы рыхтавалі мерапрыемства, то адной з нашых мэт было прадставіць выканаўцаў розных узростаў. У нашым праекце задзейнічаны навучэнцы дзіцячых музычных школ, студэнты каледжаў і Акадэміі музыкі, а таксама прафесійныя калектывы. У дні правядзення форуму адбудзецца два разнапланавыя мерапрыемствы. Першае — канцэрт эстраднай музыкі, дзе прагучаць сусветныя хіты ў выкананні дзяцей Магілёўшчыны і нашага аркестра. Другое — гала-канцэрт, на якім можна будзе паслухаць акадэмічную музыку ў выкананні ўдзельнікаў і сяброў журы анлайн-конкурсу.
Квіткі на канцэрты можна набыць у касе Магілёўскай абласной філармоніі.
Арына КАРПОВІЧ