Сінькевіч, Г. Ініцыятыўныя і мэтанакіраваныя / Ганна Сінькевіч // Настаўніцкая газета. — 2026. — 24 сакавіка. — С. 4.
Свята майстэрства і прафесіяналізму: пераможцаў абласнога этапу конкурсу «Настаўнік года» вызначылі на Магілёўшчыне
Адданыя прафесіі, любяць дзяцей і пастаянна імкнуцца да самаўдасканалення — такія педагогі працуюць на Магілёўшчыне. Пацвярджэнне гэтага — абласны этап рэспубліканскага конкурсу “Настаўнік года”. Падрабязнасці — у матэрыяле карэспандэнта “Настаўніцкай газеты”.
Традыцыйна прафесійнае спаборніцтва аб’яднала сотні педагогаў. Спачатку настаўнікі праходзілі адбор у навучальных установах, пасля — на раённым узроўні.
— У завочны тур абласнога этапу падалі заяўкі 98 канкурсантаў. Яны прадстаўлялі журы вопыт педагагічнай дзейнасці і медыявізітоўку. У вочны тур па выніках прайшлі 40 педагагічных работнікаў. Сярод іх былі своеасаблівыя тандэмы. Па двое настаўнікаў прадстаўлялі гімназію і сярэднюю школу № 2 Мсціслава, сярэднюю школу № 34 Бабруйска. А гонар гімназіі № 1 Горак абаранялі адразу трое настаўнікаў, — адзначыў рэктар Магілёўскага дзяржаўнага абласнога інстытута развіцця адукацыі Міхаіл Жудро.
Некаторыя педагогі далучаюцца да конкурсу не ўпершыню. У ліку такіх удзельнікаў — настаўнік фізічнай культуры і здароўя гімназіі № 3 Магілёва Андрэй Бязлепкін.
— Спрабую свае сілы на конкурсе ўжо трэці раз. Станавіўся лідарам на вобласці, лаўрэатам на рэспубліцы. Але засталося адчуванне нейкай недаказанасці, таму вырашыў уключыцца ў конкурсны марафон зноў. Вельмі падабаецца атмасфера спаборніцтва. Падчас выканання заданняў бывае маральна складана, але стомленасць заўсёды перакрывае моцны матывацыйны зарад да прафесійнага развіцця, — падзяліўся суразмоўнік.
Цікавыя ідэі
Сёлета арганізатары падрыхтавалі для настаўнікаў насычаную праграму. Ім неабходна было правесці ўрок у незнаёмым класе з самааналізам, прайсці псіхолага-педагагічнае тэсціраванне, даць майстар-клас і міні-ўрок на сцэне, а таксама выступіць з самапрадстаўленнем.
З прапанаванымі заданнямі канкурсанты спраўляліся выдатна. На іспытах педагогі дэманстравалі выключны прафесіяналізм, наватарскія падыходы да работы.
— Прыемна было назіраць за ўрокамі ў незнаёмых класах. Настаўнікі паказвалі глыбіню валодання прадметам, выкарыстоўвалі разнастайныя адукацыйныя тэхналогіі і сродкі навучання. Яны змаглі захапіць вучняў, знайсці да іх падыход, а таксама данесці да дзяцей вучэбны матэрыял, рэалізаваць выхаваўчы патэнцыял заняткаў, — паведаміла старшыня журы намінацыі “Фізіка, астраномія, матэматыка, інфарматыка” настаўніца фізікі сярэдняй школы № 34 Бабруйска Святлана Здаранкова.
Добра выступілі ўдзельнікі і на майстар-класах. Яны яскрава праяўлялі прафесійнае майстэрства, уменне ўзаемадзейнічаць з шырокай аўдыторыяй. Увагі былі вартыя і прэзентуемыя методыкі работы.
— Убачылі шмат цікавых ідэй. Уразілі напрацоўкі па прымяненні кантэкставых заданняў ад Яўгена Рышкевіча з Мяжысецкай сярэдняй школы Магілёўскага раёна, інтэграцыя рэгіянальнага кампанента ў навучанне ад Ільі Кіртокі з сярэдняй школы № 34 Магілёва, — заўважыў член журы намінацыі “Гісторыя, грамадазнаўства, геаграфія” дырэктар гімназіі Глуска Сяргей Сяргееў.
Адзін з самых яркіх майстар-класаў прадставіў Сяргей Ходак з гімназіі Мсціслава. Настаўнік дэталёва абазначыў асаблівасці выкарыстання ментальных карт на ўроках англійскай мовы:
— Выступалі перед будучымі педагогамі — студэнтамі МДУ імя А.А.Куляшова. Сам некалі заканчваў гэты ўніверсітэт. Прыемна было зноў апынуцца ў сценах альма-матар. У ходзе майстар-класа зрабіў упор на інтэрактыўную практыку — даў студэнтам выразную схему дзеянняў па стварэнні ментальных карт, растлумачыў відавочныя плюсы іх ужывання. У сённяшніх навучэнцаў кліпавае мысленне. Ментальныя карты — гэта менавіта той інструмент, які рэальна дапамагае дзецям запамінаць вялікія аб’ёмы інфармацыі.
Сапраўднае прызначэнне
Шчыра і пранікнёна праходзіла заданне з самапрадстаўленнем. Прынцыпы і светапогляд канкурсантаў пераконвалі: прафесія для іх — не толькі праца, а сапраўднае прызначэнне.
— Настаўнік сёння — майстар шматзадачнасці. Каб якасна вучыць і выхоўваць, прыходзіцца прымяраць на сябе самыя розныя ролі. Быць рэжысёрам, акцёрам, сцэнарыстам вучэбнага працэсу. Штодзень выходжу на гэтую сцэну з радасцю, бо бясконца люблю сваіх вучняў, — расказала Юлія Усцінава з сярэдняй школы № 26 Магілёва.
— Любое дзіця нараджаецца з крыламі. Галоўная мэта педагога — расправіць іх і дапамагчы вучню адправіцца ў палёт, скіраваць на правільны шлях, — лічыць Наталля Ткачэнка з Барсукоўскай базавай школы Клімавіцкага раёна.
Вольга Пазднякова з сярэдняй школы № 2 Горак параўнала кіраванне класам з яздой на аўтамабілі. Настаўніца пастаянна выкарыстоўвае на занятках тэматычныя формы, прымяненне знаёмых вобразаў дазваляе вучням бачыць структуру ўрока, аператыўна ўспамінаць вывучанае за кароткі тэрмін рэфлексіі.
Крэатыўным было выступленне Кацярыны Шыкуць з сярэдняй школы № 34 Бабруйска. Яна расшыфроўвала генетычны код настаўніка. На яе думку, у асобе педагога абавязкова павінна прысутнічаць любоў да дзяцей, творчасць, цярпенне, энергічнасць, уменне здзіўляць і весці за сабой.
А вось Святлана Рэянтовіч з сярэдняй школы № 21 Магілёва ўпэўнена: школа — насамрэч жыццё, бо гэты будынак прасякнуты дыханнем, рухам, смехам, характарам, марамі. Незвычайную алегорыю настаўніца выкарыстала наконт педагагічнай працы. Як былая альпіністка яна прывяла паралелі паміж выкладаннем і пакарэннем вяршынь:
— Рэгулярна здзяйсняю творчае ўзыходжанне праз школьную адукацыйную прастору па маршруце “Пачатковыя класы”. Для дзяцей я праваднік у свет ведаў. За гады ў прафесіі сабрала багаты метадычны рукзак. У ім тэхналогіі развіццёвага навучання, праектных задач, шматвектарнага чытання, крэатыўнага мыслення. Імкнуся разгледзець здольнасці вучняў, стварыць для кожнага ўласную адукацыйную траекторыю. Даю навучэнцам першы трывалы падмурак, які дазваляе ім смела і без перашкод далей ісці па вучэбнай дарозе.
Шматлікія выступленні наглядна паказалі: удзельнікі выконваюць сваю работу з неабыякавасцю і натхненнем. Значна, што конкурс стаў для педагогаў пляцоўкай для абмену вопытам, падарыў новыя знаёмствы і станоўчыя ўражанні.
— Конкурсны тыдзень быў напоўнены запамінальнымі падзеямі і эмоцыямі. Дзялілася сваімі напрацоўкамі, пераймала знаходкі калег. Адкрыла ў сабе дадатковыя прафесійныя грані, убачыла кропкі для росту, — выказалася прадстаўніца гімназіі Асіповіч Анастасія Гарадзецкая.
Парад педагагічных дасягненняў
Фінішную рысу конкурсу падводзілі на дыялогавай пляцоўцы. У нефармальнай гутарцы гаварылі аб выключнай важнасці спаборніцтва для педагагічнай грамадскасці.
— Конкурс “Настаўнік года” — парад педагагічных дасягненняў. Магілёўскія педагогі паказалі сябе ўлюбёнымі ў сваю прафесію людзьмі. Яны не проста даюць веды, а вучаць дзяцей беражліва захоўваць нацыянальную культуру і традыцыі, прывіваюць ім асноўныя каштоўнасці беларускага народа, з’яўляюцца прыкладам для моладзі, — адзначыў намеснік міністра адукацыі Уладзімір Далжанкоў.
У ходзе размовы разважалі і аб тым, якім павінен быць настаўнік года. Выснова была аднагалоснай: толькі прафесіяналізму тут недастаткова.
— Уладальнік гэтага ганаровага статусу, па сутнасці, стане настаўнікам настаўнікаў, будзе ўвасабляць айчынную сістэму адукацыі. Акрамя прафесіяналізму, гэты чалавек павінен валодаць высокімі маральнымі якасцямі. Гэта таксама патрыёт, які кожным сваім урокам, выступленнем ці словам абавязаны дэманстраваць любоў да роднай краіны і разуменне адказнасці за яе будучыню. Бо будучыня Беларусі знаходзіцца менавіта ў руках педагогаў, — лічыць прарэктар па навуковай рабоце Акадэміі адукацыі Вольга Зелянко.
Імёны пераможцаў конкурсу называлі ва ўрачыстай атмасферы. На святочнай цырымоніі неаднойчы гаварылі пра тое, як шмат у Магілёўскай вобласці таленавітых настаўнікаў.
— Усе канкурсанты — Педагогі з вялікай літары. Наогул настаўніцтва нашай вобласці знаходзіцца ў пастаянным творчым пошуку і прафесійным удасканаленні. З такімі настаўнікамі сфера адукацыі рэгіёна будзе дынамічна развівацца і паспяхова функцыянаваць, — падкрэсліла начальнік галоўнага ўпраўлення па адукацыі Магілёўскага аблвыканкама Людміла Здорыкава.
Пераможцамі ў прадметных намінацыях былі прызнаны настаўнік гісторыі Мяжысецкай сярэдняй школы Магілёўскага раёна Яўген Рышкевіч, настаўніца англійскай мовы сярэдняй школы № 2 Горак Вольга Пазднякова, настаўніца пачатковых класаў гімназіі Асіповіч Анастасія Гарадзецкая, настаўнік фізічнай культуры і здароўя гімназіі № 3 Магілёва Андрэй Бязлепкін, настаўніца матэматыкі сярэдняй школы № 3 Асіповіч Ганна Лісіцкая, настаўніца хіміі гімназіі № 1 Горак Кацярына Залатарская, настаўніца беларускай мовы і літаратуры Вяйнянскай сярэдняй школы Магілёўскага раёна Алена Ковалева.
У новых намінацыях “Малады дырэктар” і “Малады настаўнік” лепшымі сталі дырэктар сярэдняй школы № 2 Бялыніч Сяргей Лістапад і настаўніца беларускай мовы і літаратуры гімназіі № 1 Бабруйска Анастасія Бірукова. Цяпер гэтыя педагогі — каманда, якая хутка будзе прадстаўляць Прыдняпроўскі край на заключным этапе конкурсу.
Ганна СІНЬКЕВІЧ
Фота аўтара