Сінькевіч, Г. За жыццёвым вопытам — у «Тата-школу» : [у Цэнтры творчасці «Эверэст» рэалізуюць праект «Тата-школа»] / Ганна Сінькевіч // Настаўніцкая газета. — 2019. — 19 лістапада. — С. 14.
У Цэнтры творчасці “Эверэст” Магілёва вырашылі аб’яднаць хлопцаў-падлеткаў і іх татаў. У навучальнай установе ўжо другі год рэалізоўваюць карысны праект “Тата-школа. Юніёр.Бел”.
— Зараз асаблівую значнасць набывае адказнае бацькоўства. Мужчынам неабходна лепш усведамляць сваю адказнасць за паўнавартаснае развіццё дзяцей. Менавіта таму калектыў нашай установы прыняў рашэнне аб стварэнні “Тата-школы”. Падобныя праекты не новыя для Беларусі, таму мы грунтаваліся на вопыце айчынных калег, а таксама спецыялістаў са Швецыі — краіны, дзе зарадзіўся гэты рух. Ідэю мы ажыццяўлялі сумесна з грамадскім аб’яднаннем “Клуб ільвоў” і Магілёўскай абласной псіхіятрычнай бальніцай. Галоўныя мэты, якія ставілі перад сабой: умацаванне дзіцяча-бацькоўскіх адносін, актывізацыя сацыяльна значнай дзейнасці падлеткаў і мужчын, прапаганда адказнага бацькоўства, — расказала метадыст цэнтра адзін з аўтараў праекта В.А.Струновіч.
Удзельнікамі праекта сталі навучэнцы ўстаноў агульнай сярэдняй адукацыі Кастрычніцкага раёна Магілёва (і тыя, хто знаходзіцца на розных відах прафілактычнага ўліку), мужчыны, якія маюць станоўчы вопыт сямейнага жыцця і выхавання дзяцей. Сустрэчы татаў з дзецьмі праходзяць некалькі разоў на месяц у шосты школьны дзень. Мерапрыемствы для ўдзельнікаў “Тата-школы” курыруе яшчэ адзін аўтар праекта педагог-арганізатар Э.У.Шалабодаў. Праводзяцца яны па розных тэматычных напрамках.
— Мы выбралі пяць тэматычных модуляў. Усе яны закранаюць найважнейшыя напрамкі ў жыцці падлеткаў. Напрыклад, модуль “Сямейны дайджэст” праз круглыя сталы, майстар-класы, гутаркі, кансультаванне дапамагае хлопцам атрымаць новыя веды пра асаблівасці сямейнага жыцця, актуальныя пытанні выхавання і бацькоўства, — паведаміла В.А.Струновіч.
У жыцці кожнага маладога чалавека асаблівую важнасць мае правільны прафесійны выбар. Акцэнт на гэта зроблены ў модулі “Я прафесіянал”, які накіраваны на пашырэнне ўяўленняў падлеткаў пра прафесіі і на выпрацоўку ў іх індывідуальнага пункту гледжання ў прафарыентацыі. Прадстаўнікі дарослага пакалення знаёмяць моладзь з прафесіямі, па якіх яны самі працуюць. Такія непасрэдныя зносіны дазваляюць сфарміраваць у падлеткаў максімальна канкрэтныя прафесійныя ўяўленні.
Важным аўтары праекта палічылі фарміраванне прававой самасвядомасці юнакоў. Праз дыялогі і дыскусіі модуля “Я грамадзянін сваёй краіны” маладых людзей знаёмяць з нарматыўнымі прававымі актамі, якія рэалізоўваюць абарону правоў дзіцяці, сям’і, мацярынства і дзяцінства, з заканадаўствам у сферы адукацыі.
— Мы арганізавалі своеасаблівы прававы форум, у аснову якога пакладзены элементы тэхналогіі форум-тэатра — з дэталёвай прапрацоўкай пэўных жыццёвых сітуацый, звязаных з парушэннямі норм права. Не забыліся і пра далучэнне падлеткаў да сацыяльна значнай дзейнасці, — падкрэсліла В.А.Струновіч.
Прапаганда здаровага ладу жыцця ў “Тата-школе” ажыццяўляецца ў межах модуля “Я — за ЗЛЖ”. Па гэтай тэме таты і педагогі-куратары праводзяць з дзецьмі не толькі розныя фізкультурна-спартыўныя мерапрыемствы, але і заняткі, лекцыі, трэнінгі па ЗЛЖ-асвеце. Падлеткі атрымліваюць веды пра аспекты фізічнага і псіхалагічнага здароўя, негатыўныя наступствы шкодных звычак.
Значная работа праводзіцца па модулі “Я абаронца сваёй краіны”, накіраваным на фарміраванне ў хлопцаў станоўчага стаўлення да вайсковай службы. У большасці сваёй гэта азнаямленне маладых людзей з гісторыяй станаўлення арміі, яе прызначэннем, складам Узброеных Сіл Беларусі. Таты дзеляцца сваім вопытам вайсковай службы, спецыфікай і станоўчымі ўражаннямі. Модуль таксама ўключае ў сябе практычную дзейнасць, падчас якой юнакі маюць магчымасць у рэальнасці выпрабаваць на сабе армейскі побыт і рэжым.
— “Тата-школа” функцыянуе ў нашым цэнтры ўжо больш за год. Штомесяц яе наведваюць каля пяцідзесяці падлеткаў. Рэалізацыя праекта яшчэ не завершана, але яго карысць відавочная. Нам удалося наладзіць эфектыўнае ўзаемадзеянне двух пакаленняў, — адзначыла В.А.Струновіч.
І сапраўды, падчас заняткаў і тэматычных мерапрыемстваў у “Тата-школе” пераадольваецца бар’ер паміж татамі і дзецьмі, які часта бывае. А яшчэ ў аб’яднанні адбываецца своеасаблівая перадача жыццёвага вопыту ад бацькоў цяперашніх да бацькоў будучых, што найлепшым чынам рыхтуе падлеткаў да стварэння ўласнай сям’і.
На сёлетнім рэспубліканскім конкурсе праектаў па арганізацыі шостага школьнага дня ініцыятыва педагогаў Цэнтра творчасці “Эверэст” атрымала дыплом ІІІ ступені.
Ганна СІНЬКЕВІЧ.
Фота прадастаўлена ўстановай адукацыі.