Сінькевіч, Г. Педагогіка стала прызваннем : [настаўніца французскай мовы СШ № 11 Магілёва І. У. Нетук] / Ганна Сінькевіч // Настаўніцкая газета. — 2020. — 18 студзеня. — С. 14.
Добры педагог павінен быць прыкладам для сваіх вучняў. Павінен быць творчай асобай, здольнай зацікавіць дзяцей вывучэннем прадмета. Можна адточваць майстэрства, вывучаць дапаможнікі і методыкі, але без творчага падыходу да работы вельмі складана дасягнуць высокіх вынікаў. Такога меркавання прытрымліваецца настаўніца французскай мовы сярэдняй школы № 11 Магілёва Ірына Уладзіміраўна Нетук.
Cёння Ірына Уладзіміраўна лічыць настаўніцкую працу сваім прызваннем. Між тым у дзяцінстве яна і не думала звязваць прафесійнае жыццё з педагогікай. Хацела стаць урачам. Аднак пасля заканчэння школы ўслед за старэйшай сястрой накіравалася ў Мінскі дзяржаўны лінгвістычны ўніверсітэт асвойваць прафесію настаўніка замежнай мовы.
— У школе я была выдатніцай. Асабліва добра давалася мне вывучэнне замежнай мовы. Напэўна, гэтая захопленасць, а таксама прыклад сястры паўплывалі на мой прафесійны выбар, — паведаміла І.У.Нетук.
Па размеркаванні маладым спецыялістам Ірына Уладзіміраўна трапіла ў сярэднюю школу № 38 Магілёва. Потым працавала ў сярэдняй школе № 10 абласнога цэнтра, пасля аптымізацыі якой перайшла выкладаць у 11-ю гарадскую школу. Сёння за яе плячыма звыш дваццаці гадоў плённай педагагічнай дзейнасці. За гэты час педагогіка стала любімай справай. А калі займаешся тым, што любіш, пастаянна імкнешся да самаўдасканальвання. Ірына Уладзіміраўна цікавіцца ўсім, што пашырае прафесійныя гарызонты, вывучае новыя методыкі навучання, імкнецца прымяніць іх на сваіх занятках.
— Урок не павінен быць проста перадачай ведаў ад настаўніка вучню. Трэба добра выкладаць свой прадмет, зацікавіць ім дзяцей. Не менш важна знайсці і падыход да кожнага навучэнца, дапамагчы яму паверыць у сябе, — пераканана І.У.Нетук.
На сваіх уроках яна не толькі дае навучэнцам пэўны набор ведаў, але і фарміруе ў іх жаданне і ўменне вучыцца самастойна. Каб дасягнуць гэтай мэты, на занятках выкарыстоўвае сучасныя методыкі навучання: актыўна прымяняе інфармацыйна-камунікацыйныя, праектныя, кейс-тэхналогіі, розныя інтэлектуальныя гульні, пошукава-творчыя методыкі. Навучэнцам урокі І.У.Нетук вельмі падабаюцца яшчэ і таму, што гэта не сухая лекцыя. Кожныя заняткі праходзяць у форме дыялогу, падчас якога магчымы і дыскусіі, і дэбаты.
— Ірына Уладзіміраўна не толькі добры педагог, але і добры чалавек. Яна вельмі добразычлівая, з кожным вучнем размаўляе на роўных. На ўроках у яе заўсёды цікава, таму што гэта заўсёды гутарка, дыскусія. Яна сапраўды многае ведае. Нават калі пытанне не тычыцца непасрэдна прадмета, у яе ўсё роўна ёсць адказ. А яшчэ яна вучыць нас не баяцца памыляцца, бо на памылках вучацца. Усё гэта вельмі матывуе на вучобу, — падзяліліся навучэнцы 8 “Б” класа Серафім Бародзіч і Арыяна Булай.
Каб падтрымаць цікавасць вучняў да прадмета, Ірына Уладзіміраўна знаходзіцца ў бесперапынным прафесійным пошуку,
самаразвіцці. Яна доўгі час кіруе школьным франкафонным тэатрам. Разам з вучнямі ў пазаўрочны час яны распрацоўваюць і ладзяць пастаноўкі на французскай мове. Выступаюць з імі не толькі ў сценах роднай школы, не хапае тэксту і ў іншых гарадскіх агульнаадукацыйных установах і нават у дзіцячых садках.
— Добрай матывацыяй да вывучэння французскай мовы для нашых вучняў з’яўляецца білінгвістычная франкафонная секцыя, якая была адкрыта Пасольствам Францыі яшчэ на базе 10-й школы. Зараз яна працягвае функцыянаваць на базе нашай навучальнай установы. Дзеці вучацца ў секцыі з 8-га па 11-ы клас. Падчас заняткаў яны адточваюць практычнае валоданне мовай, вывучаюць эканоміку і краіназнаўства. Акрамя таго, вучні па чарзе здаюць патрэбныя экзамены па сістэме агульнаеўрапейскай кампетэнцыі валодання замежнай мовай. Пасля заканчэння навучання дзеці праходзяць міжнародны экзамен узроўню В2 з уручэннем адпаведнага сертыфіката, — расказала І.У.Нетук.
Значнае месца ў сваёй педагагічнай дзейнасці Ірына Уладзіміраўна адводзіць рабоце з адоранымі вучнямі. Усімі сіламі яна імкнецца развіць дзіцячыя таленты. Для гэтага стварае неабходныя ўмовы для самарэалізацыі адораных навучэнцаў. Сёння настаўніца выпрацавала выразную сістэму работы ў гэтым кірунку. З кожным вучнем яна працуе па індывідуальнай праграме, кожнаму дае свабоду дзеянняў, ажыццяўляючы толькі ненадакучлівы кансультацыйны кантроль за іх імкненнем да ведаў. У асноўным яна нацэльвае дзяцей на ўдзел у алімпіядным руху. І тут, на думку І.У.Нетук, асабліва важная не толькі якасная падрыхтоўка, а і псіхалагічная падтрымка з боку настаўніка.
— Я заўсёды настройваю дзяцей на поспех. Але калі нешта не атрымалася, тлумачу, што промах, памылка — гэта не трагедыя, бо памыляюцца ўсе. Важна ўсвядоміць гэта, аб’ектыўна ацаніць, а затым паспрабаваць выправіць. Толькі так можна пакарыць тыя вучэбныя вышыні, якія раней здаваліся недасягальнымі, — адзначыла І.У.Нетук.
Дзякуючы такому падыходу настаўніцы, яе вучні неаднаразова станавіліся пераможцамі розных, у тым ліку і заключнага, этапаў рэспубліканскай алімпіяды па французскай мове. Выдатна праяўляюць сябе навучэнцы Ірыны Уладзіміраўны таксама на іншых інтэлектуальных конкурсах, канферэнцыях даследчых работ школьнікаў.
Вучнёўскія поспехі для І.У.Нетук — справа прыярытэтная. Радуе яе і тое, што ўласная плённая праца не застаецца незаўважанай. Не раз Ірына Уладзіміраўна была адзначана дыпломамі і граматамі мясцовых выканаўчых улад. Яна і далей будзе працягваць рух наперад у прафесійным развіцці.
Ганна СІНЬКЕВІЧ.
Фота аўтара.