Сінькевіч, Г. Разам — да новых здзяйсненняў : [80-годдзе МДАІРа] / Ганна Сінькевіч // Настаўніцкая газета. — 2021. — 1 ліпеня. — С. 11.
Маштабная святочная ўрачыстасць прайшла ў мінулую пятніцу ў Магілёўскім дзяржаўным абласным інстытуце развіцця адукацыі. Ва ўстанове адзначылі юбілейную дату — 80 гадоў з дня заснавання.
З першых дзён інстытут выконваў каардынуючую ролю ў пытаннях методык і тэхналогій выкладання, арганізацыі дзейнасці навучальных устаноў, падрыхтоўкі настаўнікаў да ўкаранення новых вучэбных праграм. Супрацоўнікі інстытута заўсёды былі ў першых радах у выкананні задач па развіцці сістэмы адукацыі вобласці. Сучасны ІРА не толькі не страціў тых традыцый, але і прымнажае іх новымі дасягненнямі.
— Сёння інстытут — вядучы рэгіянальны цэнтр павышэння кваліфікацыі педагогаў з сучаснымі вучэбнымі аўдыторыямі, камп’ютарнымі класамі, мультымедыйнай тэхнікай. Мы дынамічна развіваемся ў розных напрамках. Нашы спецыялісты паспяхова ажыццяўляюць інфармацыйна-аналітычную, вучэбна-метадычную, навуковую, рэдакцыйна-выдавецкую дзейнасць. Шырокая практычная, інавацыйная накіраванасць, сучасныя тэхналогіі дазваляюць нам упэўнена ісці ў нагу з часам, — адзначыў рэктар МДАІРА М.М.Жудро.
Паводле яго слоў, зараз інстытут — паспяховая ўстанова, і гэта заслуга перш за ўсё педагагічнага калектыву.
— Нашы супрацоўнікі — таленавітыя, творчыя прафесіяналы сваёй справы. У нас шмат планаў на будучыню, але галоўная задача МДАІРА застанецца нязменнай — весці педагогаў вобласці да вяршынь педагагічнага майстэрства, — падкрэсліў, адкрываючы святочнае мерапрыемства, Міхаіл Міхайлавіч.
Павіншаваць інстытут з юбілеем прыбыло мноства гасцей. Гэта прадстаўнікі Магілёўскага аблвыканкама і гарвыканкама, структурных падраздзяленняў райвыканкамаў, вядучых навучальных устаноў краіны, грамадскіх арганізацый, ветэраны і супрацоўнікі МДАІРА. Усе яны адзначылі выключную ролю інстытута ў рэгіянальнай сістэме адукацыі, пажадалі ўстанове далейшага плённага функцыянавання.
— За перыяд свайго гістарычнага развіцця інстытут неаднаразова мяняў назву, але яго прызначэнне заўсёды заставалася нязменным — павышэнне кваліфікацыі педагогаў. Калектыў інстытута многае робіць і ў напрамку навукова-метадычнага суправаджэння адукацыйнага працэсу, паляпшэння агульнай якасці адукацыі. Зараз МДАІРА сапраўды з’яўляецца сістэмаўтваральным элементам у галіне адукацыі Магілёўскай вобласці. Дзякуючы высокапрафесійнаму творчаму калектыву, інстытут паспяхова функцыянуе, з’яўляецца ініцыятарам шматлікіх інавацыйных праектаў. Метадысты і супрацоўнікі — гэта лепшыя педагогі рэгіёна. Упэўнены, што МДАІРА і надалей будзе эфектыўна вырашаць усе задачы, якія стаяць перад сістэмай адукацыі, — падкрэсліў першы намеснік начальніка галоўнага ўпраўлення па адукацыі Магілёўскага аблвыканкама І.Г.Лашкевіч.
Не абышлося падчас урачыстасці і без узнагароджання лепшых супрацоўнікаў інстытута. Так, ганаровыя граматы і граматы ад Міністэрства адукацыі атрымалі Ірына Казіміраўна Мулерава, Валянціна Васільеўна Аўраменка, Ія Пятроўна Атрошанка, Алена Уладзіміраўна Бугаёва, Валерый Георгіевіч Талсціхін. Акрамя таго, заслужаныя ўзнагароды выкладчыкам МДАІРА былі ўручаны ад мясцовых выканаўчых улад, абласнога прафсаюзнага камітэта работнікаў адукацыі і навукі, іншых структур.
Цёплыя словы ў адрас калектыву інстытута дапаўнялі выдатныя творчыя выступленні магілёўскіх талентаў. Святочнае мерапрыемства завяршылася, аднак гісторыя МДАІРА працягваецца. У планах кіраўніцтва і супрацоўнікаў — напаўняць яе новымі поспехамі і здзяйсненнямі.
Ганна СІНЬКЕВІЧ.
Фота аўтара.