Дадалка, М. «Мы будзем развіваць і ствараць найлепшыя ўмовы для жыцця нашых людзей» : [А. Лукашенка адкрыў кардыялагічныя карпусы МАКБ і ФАК у мікрараёне Фаціна] / Марыя Дадалка // Звязда. — 2021. — 6 лістапада. — С. 1, 2.
Аляксандр Лукашэнка адкрыў два кардыялагічныя карпусы Магілёўскай абласной клінічнай бальніцы і фізкультурна-аздараўленчы комплекс у мікрараёне Фаціна. Такія падарункі магіляўчане атрымалі да 7 лістапада. Напярэдадні свята ці ў гэты дзень па традыцыі па ўсёй краіне адкрываюцца значныя сацыяльныя аб’екты.
СЭРЦА НА ДАЛОНІ
Сёння а 8 гадзіне раніцы кардыяхірургічны і кардыятэрапеўтычны карпусы Магілёўскай абласной клінічнай бальніцы павінны пачаць сваю работу, сказаў учора Прэзідэнту галоўны ўрач установы Анатоль Кулік. Тэрмін адкрыцця, які ідзе нават не на дні, а на гадзіны, сведчыць: настолькі неабходны цэнтр мясцовым пацыентам.
«Гэта велізарны падарунак для вобласці, пра які мы маглі толькі марыць, — кажа медык. — Асноўная мэта ўсіх гэтых пабудоў — паменшыць ліст чакання пацыентаў кардыяхірургічнага профілю. Мы рабілі 270 аперацый на адкрытым сэрцы ў год. Гэта дасць нам магчымасць зрабіць да 500, а тэрмін чакання скараціць з 18 месяцаў да трох».
Анатоль Кулік адзначае: новая кардыялогія — не толькі сцены, але і самае сучаснае абсталяванне, што дазволіць у найбліжэйшыя пяць гадоў аказваць дапамогу на сусветным узроўні.
Урачы згаджаюцца: новае абсталяванне — сапраўдны «космас» для айчыннай медыцыны. Карпусы змяшчаюць пяць сучасных аперацыйных, адна з іх гібрыдная. А гэта апошняе слова ў хірургічнай справе. У такой аперацыйнай кардыёлагі могуць рабіць не толькі маніпуляцыі на адкрытым сэрцы, але і малаінвазіўныя. З дапамогай невялікіх разрэзаў праз іголку ўрач можа праводзіць разнастайныя маніпуляцыі, бачачы свае дзеянні на велізарным экране. Дарэчы, такія высокія тэхналогіі каштавалі «касмічных» грошай — каля 10 мільёнаў рублёў. Але ці магчыма неяк ацаніць у грашах жыцці і здароўе людзей, якіх цяпер змогуць выратаваць кардыёлагі?
Магіляўчане атрымалі і сучаснае рэанімацыйнае аддзяленне — адно з найлепшых не толькі ў вобласці, але і, верагодна, у краіне. У новых карпусах магчыма будзе праводзіць разнастайныя аперацыі, не толькі звязаныя з «маторам» чалавека. Так, медыкі працягнуць там трансплантаваць ныркі. Але і на гэтым, верагодна, не спыняцца. Абсталяванне дазваляе рабіць і перасадку сэрца. Пытанне толькі ў кваліфікацыі медыкаў, але гэта справа нажыўная.
НОВЫ СЭНС БЫЛЫХ ТРАДЫЦЫЙ
Якраз напярэдадні прылёту Прэзідэнта ў горадзе пайшоў дождж. Але дрэннае надвор’е не магло адмяніць планы кіраўніка краіны адкрыць доўгачаканыя аб’екты. Мясцовыя жыхары, будаўнікі і ўрачы, накінуўшы капюшоны і пабраўшы парасоны, пад моцным дажджом чакалі прыезду кіраўніка краіны. «Вы трапілі пад дождж, але дзеля такога моманту нічога страшнага, што і падмокнем», — пачаў ён цырымонію адкрыцця.
Па традыцыі напярэдадні свята Вялікага Кастрычніка Прэзідэнт адкрывае знакавыя аб’екты для краіны. Таму адкрыццё ФАКа і кардыялогіі было прымеркавана да гэтай падзеі. «У свой час гэта было самае важнае свята разам з Днём Перамогі. Потым «разумныя» людзі ў многіх краінах вырашылі, што гэта дрэнны дзень, дрэннае свята. Я так не лічу. Прынамсі, гэта наша гісторыя, і ўсё, чым мы сёння багатыя, калі ў нас нешта добрае ёсць, сыходзіць каранямі ў савецкую эпоху», — патлумачыў Аляксандр Лукашэнка важнасць 7 лістапада.
Прэзідэнт падзяліўся: доўга думаў, як адзначаць гэтае свята, каб яго прынялі ў грамадстве. Тады ён вырашыў, не адмаўляючыся ад гісторыі краіны і імёнаў, не разбураючы помнікі, да гэтага свята імкнуцца нешта пабудаваць і падарыць народу.
«Сёння мы бачым, што зрабілі правільна, напоўніўшы новым сэнсам традыцыі святкавання Вялікага Кастрычніка, таму што з гэтай падзеі мінулага стагоддзя пачалося будаўніцтва беларускай нацыянальнай дзяржаўнасці. І мы працягваем ідэі тых, хто закладваў падмурак у будаўніцтва. І ніколі, як бы камусьці сёння ні хацелася, не перарвём гісторыю гэтых працоўных подзвігаў. Не спыняць нас ні санкцыі, ні пандэмія, як у свой час нас не спыніла ні грамадзянская, ні Вялікая Айчынная вайна. У сілу сваіх магчымасцяў мы будзем развіваць і ствараць найлепшыя ўмовы для жыцця нашых людзей», — сказаў Прэзідэнт.
Яго візіт у Магілёў фактычна даў старт чарзе значных адкрыццяў «абновак» у рэгіёнах.
СКАЗАНА — ЗРОБЛЕНА
Прэзідэнт, які сам пэўную частку свайго жыцця правёў у Магілёве, добра ведае горад. Але адзначае: кожны раз здзіўляецца: усё забудоўваецца, горад развіваецца. Па словах Прэзідэнта, за апошнія пяць гадоў, калі асаблівая ўвага ўдзялялася Магілёву, горад стаў значна лепшым. Стараецца для свайго рэгіёна старшыня аблвыканкама Леанід Заяц.
Прэзідэнт успомніў: калі быў у Магілёве мінулы раз, сумняваўся, што будаўніцтва кардыялагічных карпусоў завершаць да лістапада. Губернатар пераканаў: «Паспеем!» Дарэчы, слова сваё ён стрымаў і перад Прэзідэнтам, і перад магіляўчанамі. «Я спецыяльна, выбіраючы ў краіне, куды паехаць, вырашыў, што ў гэтыя складаныя часы бальніца, ахова здароўя і спорт — гэта тое, што трэба нашым людзям», — сказаў Аляксандр Лукашэнка.
Яшчэ ў мінулым снежні, калі кіраўнік краіны наведваў Магілёўскую бальніцу, урачы звярталіся да яго з просьбай дапамагчы з будаўніцтвам. Прэзідэнт тады заявіў, што дапаможа, але не толькі ва ўзвядзенні сцен, але і ў набыцці самага сучаснага абсталявання. Кіраўнік дзяржавы заўважыў, што падобныя аб’екты належаць народу, таму ні ў якім выпадку яны не павінны быць прыватызаваныя па прыкладзе заходніх краін.
Прэзідэнт працягнуў медыцынскую тэму інфармацыяй па ковіду. Па яго словах, «спаўзаем» з вяршыні і вяртаем ковідныя ложкі ў звычайны рэжым.
Апошняе пажаданне Прэзідэнта прысутным на цырымоніі адкрыцця гучала так: «Жыць і не трапляць сюды, а калі раптам здарыцца — гэта для вас пабудавана. Акажам усю дапамогу і падтрымку».
Спорт, сродкі індывідуальнай аховы, вакцынацыя — Прэзідэнт у прамове яшчэ раз нагадаў пра неабходныя правілы для падтрымання здароўя ў гэты няпросты час. Але заявіў: прымушаць насельніцтва не будуць — кожны сам вольны вырашаць, як берагчы сябе.
«Памятайце, што вы перадусім творцы свайго здароўя», — акцэнтаваў кіраўнік краіны.
Сімвалам памятнай даты запуску карпусоў для кардыёлагаў Магілёва стала адкрыццё Прэзідэнтам знака «Дар жыцця». Ён уяўляе сабою валун з рэльефам сэрца на далонях. Дарэчы, кіраўніку дзяржавы на памяць таксама падарылі сувенір з выявай гэтага вобраза.
ВАМ — УМОВЫ, КРАІНЕ — ДАСЯГНЕННІ
Пасля кардыялагічных карпусоў Прэзідэнт наведаў сучасны ФАК у мікрараёне «Фаціна». Комплекс мае залу барацьбы, бокса, фітнесу, «трэнажорку», цір, лазню, басейны (на 50 і 25 метраў), кавярню і гасцініцу, якая будзе прымаць каманды з іншых рэгіёнаў. Вялікі басейн змяшчае дзесяць дарожак і 500 пасадачных месцаў, такім чынам, там проста можна праводзіць нацыянальныя чэмпіянаты. Прэзідэнт пазнаёміўся з ходам трэніровак будучых весляроў у трэнажорнай зале. Ён абмеркаваў праблемы падрыхтоўкі спартсменаў-весляроў з адным з трэнераў ФАКа. «Гэта добры цэнтр. Але тут трэба даваць вынікі, патрабаваць з трэнераў і кіраўніцтва вынікаў», — рэзюмаваў Аляксандр Лукашэнка.
Каля ФАКа яшчэ да заканчэння наведвання залаў Прэзідэнта чакалі гараджане. Як звычайна, сустрэчы з такім стыхійным натоўпам Прэзідэнт ніколі не абмінае. «Паколькі гэта нечакана, гатовы разважаць пра тыя праблемы, па якіх вы палічыце неабходным паразмаўляць», — сказаў кіраўнік краіны.
Аляксандр Лукашэнка заўважыў, што, калі праехаў па гэтай дарозе, успомніў свае дзіцячыя гады. «Я добра ведаю гэты раён, але яго не пазнаю. Ён за чвэрць стагоддзя не проста змяніўся — ён проста новым стаў, — закрануў Прэзідэнт тэму будаўніцтва жылля для чаргавікоў. — Адзінае маё патрабаванне — на гэтых дамах калі нехта і павінен зарабіць, то дзяржава. Ніякага прыватнага непатрэбнага нам будаўніцтва».
Аляксандр Лукашэнка заўважыў: ён не супраць прыватнікаў, але гэта павінны быць паўнавартасныя будаўнічыя фірмы з дастатковай колькасцю персаналу і профільнымі спецыялістамі.
«Прыярытэт павінен быць аддадзены гэтым трэстам. Гэта дзяржаўныя, дзяржава адказвае. І калі мы навялі тут парадак, рэзка зменшыліся даўгабуды, якія нам давялося дабудоўваць, — звярнуў увагу кіраўнік дзяржавы. — Цяпер парадак навялі. І ў гэтым напрамку мы павінны рухацца. Вядома, камусьці гэта не падабаецца. Ведаеце, каму. Але гэта ўжо іх праблемы. Мы павінны працаваць у інтарэсах пераважнай большасці людзей. Паглядзім два-тры гады, у што гэта выльецца. Пакуль гэта дае добры вынік».
Кіраўнік дзяржавы даў магіляўчанам прэзідэнцкія парады па здаровым ладзе жыцця. У першую чаргу ён заклікаў не кідацца на імпартную ежу і сказаў, што сам, нягледзячы на існуючыя магчымасці, стараецца ўжываць толькі айчынныя прадукты. «Свае — і бульбачка, і морква, і капуста… Усё ж мы вырабляем! А мяса-малочная прадукцыя — найлепшая ў свеце. Таму харчавацца вы павінны толькі сваімі прадуктамі. Гэта мая вам парада», — сказаў Аляксандр Лукашэнка.
І любімая традыцыйная рэкамендацыя кіраўніка краіны — займацца фізкультурай і спортам. Для гэтага ёсць усё: зімой — ФАК, летам паблізу — бераг прыгажуна Дняпра.
Яшчэ адна парада — займацца дачнай гаспадаркай. Таму кіраўнік дзяржавы заклікаў больш актыўна набываць і асвойваць участкі зямлі за межамі гарадоў. «Трэба больш актыўна асвойваць пустыя сядзібы. Ляціш над Беларуссю, і проста шкада. Калі ёсць невялікая капейка, вы лепш укладзіце ў гэту зямлю. І дзяцей адарвіце ад гэтых гаджэтаў. Усё ў простым, давайце не забываць, што было добрага ў нашы гады», — кажа Прэзідэнт.
Выказаўся ён і аб рабоце мясцовага прадпрыемства «Магілёўхімвалакно», паабяцаў дапамогу, але заўважыў: час ужо і самім падымацца на ногі.
«Павінна і «хімвалакно» працаваць. Завод штучнага валакна вы знеслі, але гэта была мая каманда: будуйце там жыллё. А вось «хімвалакно» трэба закручваць як след, і яны пачынаюць ужо працаваць», — адзначыў Прэзідэнт.
Паводле яго слоў, на прадпрыемстве неабходна цалкам абнавіць вытворчасць, праекты ўжо ёсць. Гэта важна ў тым ліку і з пункту гледжання стварэння працоўных месцаў, бо прадпрыемства — брэнд Магілёва, ад гэтага нікуды не дзенешся.
Падчас афіцыйных мерапрыемстваў знайшлося месца і для сентыментальнага. Адна з магіляўчанак па імені Алена пры ўсіх прызналася Аляксандру Лукашэнку ў любові. «Я сёння прыйшла не задаваць вам пытаны, а прызнацца вам у любові. Сапраўдны мужчына», — упэўнена вымавіла жанчына. «Зноў у інтэрнэце напішуць, што новая палюбоўніца», — пажартаваў Прэзідэнт. «Вы сапраўдны мужчына: сказана — зроблена. Дзякуй вам за ўсё тое, што вы робіце для нашай краіны — Беларусі. Дзякуй проста за тое, што вы ёсць у нас. Я жыву ў Беларуси працую ў Беларусі і люблю галоўнага беларуса краіны — вас, Аляксандр Рыгоравіч», — адказала магіляўчанка.
«Усё, што мы, мужыкі, робім, мы робім дзеля вас», — прызнаўся Прэзідэнт.
Марыя ДАДАЛКА, г. Магілёў.