Зігуля, Н. Шанц для юных талентаў : у Магілёве падвялі вынікі III Міжнароднага фестывалю-конкурсу мастацтваў «Залатая мара» / Нэлі Зігуля // Звязда. — 2021. — 6 лістапада. — С. 5.
У Магілёве падвялі вынікі ІІІ Міжнароднага фестывалю-конкурсу мастацтваў «Залатая мара»
Болей чым сто канкурсантаў ва ўзросце ад 4+ з Магілёўскай, Мінскай, Віцебскай і Гомельскай абласцей сабраліся ў Магілёве, каб прадэманстраваць, на што здольныя ў мастацкай творчасці. На працягу двух дзён яны сапернічалі паміж сабой у музычна-інструментальным, вакальным, тэатральным, харэаграфічным жанрах. Найлепшыя вызначыліся ў сямі ўзроставых групах у 12 намінацыях. Было шмат яркіх галасоў, нумароў, эмоцый. І зразумела адно: талентамі наша краіна не абдзелена.
— Журы адзначыла высокі прафесійны ўзровень нашых сёлетніх удзельнікаў, — адзначыла загадчыца сектара мастацка-эстэтычнай адукацыі Магілёўскага абласнога метадычнага цэнтра народнай творчасці і культурна-асветнай работы Святлана ЯФРЭМАВА. — Фестываль запомніцца вялікай колькасцю яркіх і незабыўных выступленняў. Самыя моцныя з удзельнікаў атрымалі Гран-пры і званні лаўрэатаў. На жаль, пандэмія перашкодзіла разгарнуцца фестывалю на поўную моц. Хоць былі ахвотныя прыехаць з Бранска, Смаленска. Наш фестываль малады, але яго ўжо ведаюць і высока ацэньваюць. Асноўная мэта — падтрымка творчай моладзі і дзяцей і пашырэнне культурнага супрацоўніцтва.
Гран-пры ў жанры «Музычна-інструментальнае мастацтва» атрымаў выхаванец бабруйскай дзіцячай школы мастацтваў № 1 імя Я. К. Цікоцкага Ігар УРБАНОВІЧ, у жанры «Вакальнае мастацтва» перамог фальклорны ансамбль «Май» Магілёўскага дзяржаўнага каледжа мастацтваў. Вышэйшую ўзнагароду ў жанры «Харэаграфічнае мастацтва» атрымала 12-гадовая Марыя ШАШКОВА, удзельніца танцавальнага калектыву «Stay Dance Progect» Дзіцячай школы мастацтваў імя Анатоля Каплана з Рагачова, а ў жанры «Тэатральнае мастацтва» не было роўных узорнаму тэатральнаму калектыву «Тэст» сярэдняй школы № 4 з Віцебска.
Нэлі ЗІГУЛЯ.