Сінькевіч, Г. Цікавыя праекты, прагрэсіўныя ідэі / Ганна Сінькевіч // Настаўніцкая газета. — 2023. — 2 чэрвеня. — С. 11.
Магілёўскі дзяржаўны ўніверсітэт імя А.А.Куляшова заслужана называюць адным з найбуйнейшых навукова-адукацыйных цэнтраў рэгіёна. Ва ўстанове вядуцца навуковыя даследаванні па шырокім спектры напрамкаў, прадстаўляюцца перадавыя навуковыя распрацоўкі. Значны ўклад у навуку тут уносіць моладзь.
За доўгую гісторыю развіцця ўніверсітэта ў нас сфарміравалася сем ключавых навуковых школ: па матэматыцы, фізіцы, гісторыі, філалогіі, педагогіцы, фізіялогіі і спартыўнай педагогіцы. Да заняткаў навуковай дзейнасцю далучана моладзь. Студэнты і маладыя выкладчыкі актыўна і з энтузіязмам распрацоўваюць цікавыя праекты, прапануюць прагрэсіўныя ідэі, — расказала прарэктар па навуковай рабоце Наталля Макоўская.
Паводле яе слоў, маладыя вучо-ныя ўніверсітэта заўсёды ўносяць перспектыўныя прапановы. Многія з іх нацэлены на вырашэнне праблемных пытанняў у сферы адукацыі. Так, студэнты факультэта матэматыкі і прыродазнаўства Мікіта Пацэйка і Сцяпан Самулёў распрацавалі спецыялізаваны дадатак Math Graphics, накіраваны на аказанне дапамогі ў вывучэнні матэматыкі.
— Зыходзілі з тых цяжкасцей, з якімі сутыкнуліся самі. Некаторыя матэматычныя функцыі ці графікі дастаткова складана зразумець. Мы вырашылі паспрабаваць прадставіць іх у ЗР-фармаце. На словах і на дошцы пэўныя тэмы ў матэматыцы выглядаюць абстрактна, а вось наглядны малюнак дапамагае даволі хутка зразумець іх сутнасць. Дадатак дапаможа не толькі навучэнцам, але і настаўнікам. Мы дапоўнілі яго функцыяй ажыццяўлення кантролю за дзейнасцю вучняў. Праз просты алгарытм педагог зможа бачыць, якія задан-ні выканаў навучэнец і наколькі дакладна ён гэта зрабіў. Цяпер спрабуем удасканаліць наш Math Graphics. У планах — зрабіць дадатак даступным для ўстаноўкі на мабільныя тэлефоны, — расказаў Мікіта Пацэйка.
Убачыць сваю распрацоўку ў адкрытым доступе імкнецца і старшы выкладчык кафедры тэорыі і методыкі фізічнага выхавання Юрый Кучараў. Малады вучоны стварыў дадатак MASP, які спрыяе папулярызацыі спорту сярод насельніцтва і сістэматызацыі гэтых заняткаў.
— Мая асноўная мэта — масава прыцягнуць нашых грамадзян да заняткаў спортам. Праз дадатак да спорту змогуць далучыцца ўсе: ад дзяцей да пенсіянераў. Для кожнага карыстальніка распрацоўка будзе выдаваць індывідуальную методыку трэніровак на падставе даных анкеты, унесеных пры рэгістрацыі. Зараз у дадатку прадстаўлены чатыры віды спорту: бег, плавание, веласпорт і лыжныя гонкі. У залежнасці ад сваіх дасягненняў карыстальнік можа пераходзіць на больш высокую катэгорыю. Своеасаблівым матывацыйным момантам стане таксама «магазін прызоў». За кожную паспяховую трэніроўку будуць налічвацца ачкі, якія пасля магчыма абмяняць на «рбкоінсы». Гэтая віртуальная валюта дазволіць набыць пэўнае матэрыяльнае заахвочванне. Прызы будуць прэстыжнымі, мы ўжо вядзём перамовы з брэндавымі вытворцамі спартыўных тавараў. Плануем таксама праводзіць чэленджы і марафоны, праз дадатак аб’ядноўваючы захопленых спортам людзей з розных куткоў краіны, — паведаміў Юрый Кучараў.
Распрацоўка Юрыя Юр’евіча ўжо была адзначана. Ён увайшоў у лік лаўрэатаў заключнага этапу сёлетняга рэспубліканскага конкурсу «100 ідэй для Беларусі», прадстаўляў свой дадатак на выставе «Беларусь інтэлектуальная». У планах аўтара — пашырыць пералік відаў спорту і дапрацаваць інтэрфейс. Пасля MASP бясплатна будзе даступны для ўсіх жадаючых.
Не менш цікавы праект распрацавалі на факультэце педагогікі і псіхалогіі дзяцінства. Вучэбная праграма «Экафрэндлі з пялёнак» накіравана на фарміраванне ў дзяцей уяўленняў аб прынцыпах збору і ўтылізацыі смецця.
— Распрацоўкай займаліся студэнткі Вераніка Дуйнова, Віялета Пуськова і Настасся Невіданава. Праблемы экалогіі зараз вельмі актуальныя, таму мы пастараліся стварыць гульнявую праграму, якая сфарміруе ў дзяцей асновы ўтылізацыі смецця. Гэты напрамак мы выбралі нездарма. Сістэма раздзельнага збору адходаў дзейнічае ў краіне ўжо некалькі гадоў, але насельніцтва працягвае выкідваць смецце ў адзін кантэйнер. Гэта сведчыць пра недастатковасць уяўленняў людзей аб правільнай утылізацыі. Значыць, трэба павышаць узровень экалагічнай культуры, а пачынаць гэта рабіць лепш за ўсё з дашкольнага ўзросту. Мы распрацавалі спецыяльныя гульнявыя трэнінгі для дашкольнікаў, кароткатэрміновыя адукацыйныя курсы для выхавальнікаў, медыярэсурсы для бацькоў. Упэўнены, усё тэта ў комплексе дапаможа вырасціць новае пакаленне экафрэндлі, — адзначыла кіраўнік праекта старшы выкладчык кафедры педагогікі дзяцінства і сям’і Таццяна Мажарава.
У МДУ імя А.А.Куляшова нямала распрацовак і для рэальнага сектара эканомікі. Напрыклад, старшы выкладчык кафедры прыродазнаўства Кацярына Кавалёва стварыла лабараторную ўстаноўку, якая дазваляе дасканала вывучаць гетэрагенныя раўнавагі — працэсы выпарэння і сублімацыі арганічных злучэнняў. А на кафедры фізікі і камп’ютарных тэхналогій распрацоўваецца эксперыментальная ўстаноўка для даследавання танкаплёначных нанаразмерных структур. Старшы выкладчык Артур Шылаў і аспірант Яўген Чудакоў імкнуцца стварыць малагабарытную прыладу з праграмным забеспячэннем для камп’ютара. Пад устаноўку маладыя вучоныя ўжо вынайшлі ўласны метад бескантактавай хваляводнай спектраскапіі. У іх планах — атрыманне патэнта і ўкараненне распрацоўкі на прадпрыемствах па вырабе мікра- і оптаэлектронікі.
— Маладзёжныя ініцыятывы імкнёмся падтрымліваць. Ва ўніверсітэце дзейнічае савет маладых вучоных, прадугледжаны розныя формы матывацыі. Гэта стымулюе моладзь на раскрыццё свайго навуковага патэнцыялу. Перадавыя распрацоўкі ў нас з’яўляюцца пастаянна, — падкрэсліла Наталля Макоўская.