Умацаванне пазіцый Саюзнай дзяржавы / паводле БелТА // Звязда. — 2024. — 24 верасня. — С. 3.
У Магілёве адбылося пасяджэнне Савета Парламенцкага сходу Беларусі і Расіі
Вітаючы ўдзельнікаў пасяджэння на магілёўскай зямлі, першы намеснік старшыні Парламенцкага сходу Саюза Беларусі і Расіі, Старшыня Палаты прадстаўнікоў Нацыянальнага сходу Беларусі Ігар СЕРГЯЕНКА нагадаў, што 85 гадоў таму нашы продкі абаранялі гэтую зямлю ад нацысцкіх полчышчаў даўжэй, чым сваю тэрыторыю асобныя еўрапейскія краіны, якія хутка здаліся ў палон. «Сёння сітуацыя шмат у чым падобная, але мы сутыкнуліся з рэальнымі выклікамі, якія нясуць пагрозу самому існаванню і Беларусі, і Расіі, — канстатаваў ён. — Наша задача як парламентарыяў — усяляк садзейнічаць умацаванню пазіцый Саюзнай дзяржавы».
У гэтай сувязі тэмы, вынесеныя на разгляд Савета Парламенцкага сходу, па меркаванні спікера, маюць важнае значэнне. Па яго словах, у сітуацыі, калі на Беларусь і Расію сыплюцца супрацьпраўныя санкцыі, найлепшым адказам могуць быць толькі моцныя сувязі і прадукцыйнае ўзаемадзеянне дзвюх краін, рост дабрабыту народаў, захаванне агульнай гістарычнай памяці.
Ігар Сергяенка назваў міжрэгіянальнае і прыгранічнае су-працоўніцтва адным з ключавых момантаў, якое забяспечвае паспяховае развіццё інтэграцыйных працэсаў у Саюзнай дзяржаве. «Таму прэзідэнтамі Беларусі і Расіі, урадамі робіцца ўсё для гэтага развіцця, — падкрэсліў ён. — Толькі за мінулы перыяд гэтага года Беларусь і Расію наведалі больш за 100 дэлегацый розных рэгіёнаў нашых дзяржаў. За сем месяцаў бягучага года тавараабарот вырас на 8,5 %, і ў грашовым эквіваленце гэты рост склаў $2,3 млрд. У цэлым за ўвесь мінулы год планка $53 млрд была пераадолена. За гэтымі лічбамі, вядома ж, стаяць пашырэнне вытворчасцяў, стварэнне новых рабочых месцаў, умацаванне кааперацыйных сувязяў, распрацоўка, укараненне перадавых тэхналогій і гэтак далей. Усё гэта дапамагае рабіць нашы рэгіёны моцнымі, а людзей, якія жывуць у іх, упэўненымі ў сучаснасці і будучыні».
Падчас пасяджэння абмяркоўвалася пытанне забеспячэння роўных правоў грамадзян Беларусі і Расіі ў сферы аховы здароўя. «Што датычыцца роўнага доступу да аказання медыцынскай дапамогі, то катэгорыі грамадзян, якія маюць права на яе атрыманне і віды медыцынскага абслугоўвання, вызначаны ў міжурадавым пагадненні, падпісаным яшчэ ў 2006 годзе, — нагадаў Старшыня Палаты прадстаўнікоў. — Але з улікам паглыблення інтэграцыйных сувязяў, рашэнняў, прынятых кіраўнікамі нашых дзяржаў, і рэалізацыі саюзных праграм, магчыма, прыйшоў час скарэкціраваць некаторыя палажэнні. Ці ўсё сёння задавальняе спецыялістаў у сістэме абмену вопытам, павышэнні кваліфікацыі медыцынскіх кадраў, наколькі эфектыўна рэалізоўваюцца пагадненні паміж медыцынскімі ВНУ нашых краін (а такіх пагадненняў, дарэчы, каля 150). Акрамя таго, важна ведаць меркаванне экспертаў аб укараненні перспектыўных медыцынскіх тэхналогій і айчынных распрацовак, якія дасягненні ёсць і наколькі шырока прымяняюцца».
Вырашыць усе пытанні ў рамках аднаго пасяджэння, як заўважыў Ігар Сергяенка, не атрымаецца. «Галоўная наша задача — паскорыць гэты працэс і абазначыць тыя напрамкі, па якіх мы павінны працаваць», — рэзюмаваў ён.
Як адзначыў у размове з журналістамі дзяржаўны сакратар Саюзнай дзяржавы Дзмітрый МЕЗЕНЦАЎ, парламентарыі робяць усё магчымае, каб іх змястоўны ўклад у агульную практыку саюзнага будаўніцтва з кожным крокам і з кожным годам быў больш важкі. «Сёння размова аб гуманітарным кампаненце, аб забеспячэнні роўных правоў грамадзян у атрыманні медыцынскай дапамогі, прапанове мадэльнага закона аб прыгранічным супрацоўніцтве — гэта ўсё вялікі ўклад ва змястоўную работу напярэдадні 25-годдзя саюзнага дагавора», — канкрэтызаваў ён.
Дзмітрый Мезенцаў адзначыў і работу з камісіямі ў рамках Савета Парламенцкага сходу Саюза Беларусі і Расіі. «Мы таксама бачым, што практыка ўзаемаадносін, работы з камісіямі Парламенцкага сходу, Пастаяннага камітэта з сакратарыятам Парламенцкага сходу стала іншай, значнай, важнай і гранічна змястоўнай, — заўважыў ён. — Літаральна праз некалькі дзён адбудзецца група высокага ўзроўню Савета Міністраў Саюзнай дзяржавы ў Мінску. Там у нас 23 прадметныя пытанні двухбаковага ўзаемадзеяння ў саюзных фарматах. Частка з гэтых пытанняў пераклікаецца з тым парадкам дня, які быў прадстаўлены. Ён паказаў, што міністэрствы аховы здароўя Беларусі і Расіі заклапочаны выраўноўваннем той практыкі, якая павінна быць надзейным гарантам у пытаннях забеспячэння здароўя і сацыяльнай абароны».
Паводле БелТА.