Зігуля, Н. Дыплом і пагоны / Нэлі Зігуля // Звязда. — 2025. — 13 лютага. — С. 11.
У Магілёве ў Беларуска-Расійскім універсітэце ўрачыста адкрылася ваенная кафедра
Заняткі тут пачнуцца ў сакавіку. Але перадавое сучаснае абсталяванне, уся неабходная матэрыяльна-тэхнічная база для тэарэтычнай і практычнай адпрацоўкі ўжо ёсць. Удзел у афіцыйным адкрыцці ваеннай кафедры ўзялі прадстаўнікі кіраўніцтва ВНУ, міністэрстваў абароны і адукацыі, студэнты.
— Мы фактычна завяршылі фарміраванне рэспубліканскай сеткі для падрыхтоўкі нашых студэнтаў на ваенных кафедрах і факультэтах, — паведаміў першы намеснік міністра адукацыі Аляксандр БАХАНОВІЧ, сам выпускнік гэтай ВНУ і ваеннай кафедры 1993 года. — У краіне 16 ВНУ, дзе існуюць ваенныя факультэты і кафедры. Штогод з іх выпускаецца каля 1600 лейтэнантаў запасу. Іх падрыхтоўка вядзецца па болей чым 40 ваенна-ўліковых спецыяльнасцях па заказе Мінабароны. Гэта спецыялісты, неабходныя на выпадак непрадбачаных сітуацый, каб тэрмінова выйсці з запасу і стаць у строй.
Рэктар БРУ Міхаіл ЛУСЦЯНКОЎ упэўнены, што і для ВНУ, і для студэнтаў адкрыццё кафедры — важная падзея.
— Студэнты, якія будуць вучыцца тут, складуць ядро, якім можна будзе ганарыцца, — спадзяецца ён. — Адказныя, дысцыплінаваныя, яны будуць прыкладам ва ўсім. Самае галоўнае, што яны атрымаюць практычныя веды для абароны Радзімы. Кожны малады чалавек павінен умець гэта рабіць у выпадку небяспекі.
Палкоўнік у адстаўцы Анатоль ПАЛЯКОЎ не хаваў сваёй радасці. З 1988 да 1993 года ён узначальваў тут ваенную кафедру і яе ж закрываў. Цяпер ён шчаслівы, што яна адрадзілася.
— Для мяне гэта доўгачаканая падзея, я гэтым ганаруся, — кажа ён. — Гэта толькі на карысць нашым студэнтам. На машынабудаўнічым факультэце глыбока вывучаецца матэматыка, а гэта той прадмет, які вельмі неабходны для артылерыста. У нас ёсць таксама «аўтамех» — цудоўная база для падрыхтоўкі афіцэраў-аўтамабілістаў. Перакананы, што паспяховасць студэнтаў толькі палепшыцца.
Прохар Лусцянкоў — адзін з тых 75 студэнтаў БРУ і МДУ імя А. Куляшова, якія прайшлі медыцынскі адбор і вытрымалі конкурс па паспяховасці. Сярэдні бал у яго 9,5. Малады чалавек лічыць, што яму вельмі пашчасці ла, бо адначасова з грамадзянскай спецыяльнасцю ён атрымае яшчэ і ваенна-ўліковую.
Пад час экскурсіі па ўніверсітэце прысутныя азнаёміліся з распрацоўкамі тэхнічнай ВНУ, яе матэрыяльна-тэхнічным аснашчэннем, прайшліся па аўдыторыях. Навучанне будзе весціся з прымяненнем высокіх тэхналогій, а практычныя заняткі — у вучэбным цэнтры ў Казіміраўцы.
Нэлі ЗІГУЛЯ.