Зiгуля, Н. У Магiлёве раздалi крыштальныя алоўкi : XIX Мiжнародны фестываль анiмацыйных фiльмаў «Анiмаёўка-2016» назваў пераможцаў / Нэлi Зiгуля // Звязда. — 2016. — 3 лiстапада. — С. 16.
Тры дні ў Магілёве, Бабруйску і Быхаве панавала атмасфера дзяцінства — у кінатэатрах круцілі мульцікі, адбываліся цікавыя творчыя сустрэчы з вядомымі аніматарамі, праходзілі прэзентацыі, выставы і майстар-класы.
У Магілёве паглядзець мульцікі можна было нават на вуліцы — кінатэатр «Радзіма» дэманстраваў іх на адкрытым экране. Усяго на працягу форуму было паказана больш за 380 аніматарскіх стужак з 45 краін свету. Вельмі насычанай і разнастайнай стала і конкурсная праграма. На дыпломы пераможцаў і вялікі крыштальны аловак — а іх было ўсяго 7 — прэтэндавала 103 фільмы з 34 краін. І нават кампетэнтнаму міжнароднаму журы пад старшынствам легенды сусветнай мультыплікацыі Леаніда Носырава не так проста было назваць пераможцаў.
У выніку Гран-пры фестывалю дастаўся мультфільму «Налім Маліныч» з цыкла «Гара самацветаў» расійскага рэжысёра Сцяпана Бірукова. Лепшым фільмам для дзяцей стала кінастужка «Вялікія канікулы» рэжысёра з Бельгіі Караліны Нуквэс-Боўрчат. Калектыў аўтараў «Атэлье Collectіf» з гэтай жа краіны атрымаў дыплом за лепшы эксперыментальны фільм «Непрахадная Зона». У намінацыі за лепшае мастацкае рашэнне перамагла беларускі рэжысёр Алена Піткевіч з фільмам «Марк Шагал. Пачатак». Дыплом «Майстру» ўручылі ганароваму кінематаграфісту Расійскай Федэрацыі Веры Кудраўцавай. Лепшым дэбютам названы стужкі «Дэвіт» нямецкага рэжысёра Дэвіда Янсена і фільм «Чхая» індыйскага рэжысёра Дзебанджана Нандзі.
Асобна праводзіўся конкурс сярод юных аніматараў, у якім удзельнічалі дзеці з 5-гадовага ўзросту. Сёлета на малы крыштальны аловак прэтэндавала 69 работ аўтараў з Беларусі, Расіі, Украіны, Малдовы, Бельгіі.
Сваіх пераможцаў вызначалі і ў конкурсе дзіцячага выяўленчага мастацтва і дэкаратыўна-прыкладной творчасці. На фестываль было прадстаўлена 439 работ з Беларусі, Расіі, Кыргызстана, Малдовы, Балгарыі.