Сiнькевiч, Г. Для аказання псiхалагiчнай дапамогi дзецям : [магiлёўскiя ўстановы дадатковай адукацыi] / Ганна Сiнькевiч // Настаўніцкая газета. — 2017. — 18 лютага. — С. 19.
Магілёўскія ўстановы дадатковай адукацыі годна прадставілі сябе на Рэспубліканскім конкурсе «Лепшая метадычная распрацоўка», арганізатарам якога выступаў Нацыянальны цэнтр мастацкай творчасці дзяцей і моладзі.
Мерапрыемства праводзілася ў мэтах стымулявання творчай актыўнасці і ўдасканалення прафесійнага майстэрства педагагічных работнікаў, а таксама выяўлення і абагульнення лепшага вопыту па ажыццяўленні сацыяльна-педагагічнай падтрымкі і псіхалагічнай дапамогі навучэнцам. Судзейская камісія разглядала эфектыўныя распрацоўкі педагогаў у трох тэматычных намінацыях. Пры гэтым улічвалася актуальнасць і навізна прапанаваных матэрыялаў, іх сацыяльная і педагагічная значнасць.
У навучальных установах Магілёўшчыны ў гэтым плане імкнуцца арыентавацца на патрабаванні часу, запыты бацькоў і навучэнцаў. Педагогі і псіхолагі пастаянна ўкараняюць у адукацыйны працэс сучасныя методыкі і тэхналогіі. Свае ідэі яны добра прэзентавалі і на конкурсе. Усяго вобласць была прадстаўлена пятнаццаццю работамі. Большасць з іх былі адзначаны пераможнымі дыпломамі, бо сапраўды змяшчалі карысныя прапановы па удасканаленні функцыянавання псіхолага-педагагічных службаў.
Так, адна з прызёраў конкурсу педагог-псіхолаг шматпрофільнага цэнтра “Ветразь” Бялыніч Таццяна Казлоўская распрацавала дзейсныя падыходы па псіхалагічным суправаджэнні адораных дзяцей. Паводле яе слоў, асноўнай мэтай усіх супрацоўнікаў цэнтра з’яўляецца падтрымка навучэнцаў у вызначэнні іх схільнасцей і магчымасцей, таму і былі распрацаваны спецыяльная мадэль, адукацыйная праграма, метадычнае забеспячэнне, дыдактычны раздатачны матэрыял, наглядныя дапаможнікі, дыягнастычны інструментарый, камп’ютарныя вучэбныя гульні, якія дапамагаюць у рабоце на максімальна высокім узроўні з адоранымі дзецьмі.
— У сваёй методыцы мы абапіраемся на тое, што ўсе дзеці розныя, але кожны з іх па-свойму адораны. Проста хтосьці валодае прыроджанымі талентамі, а ў іншых здольнасці трэба развіваць, — адзначае Таццяна Дзмітрыеўна.
Каб дапамагчы дзецям разабрацца ў іх здольнасцях і цікавасцях, ва ўстанове праводзіцца дыягностыка і аказваецца карэкцыйна-развіццёвая падтрымка. А для бацькоў і педагогаў прадугледжаны кансультацыі і асветніцкія гутаркі. Па выніках гэтай работы складаюцца індывідуальныя адукацыйныя маршруты для ўсіх навучэнцаў. Такі падыход не толькі дазваляе раскрыць дзіцячыя таленты, але і спрыяе паспяховаму прафесійнаму самавызначэнню навучэнцаў.
Адной з лепшых стала і распрацоўка педагога-псіхолага шматпрофільнага цэнтра па рабоце з дзецьмі і моладдзю “Юнацтва” Магілёва Алены Чыкуновай. Пад яе кіраўніцтвам ва ўстанове распрацавалі станоўчыя формы работы псіхолага-педагагічнага суправаджэння дзяцей у адаптацыйны перыяд навучання. Для падтрымкі дзяцей падчас прывыкання да цэнтра тут праводзяць адпаведную дыягностыку, выяўляюць асаблівасці кожнага навучэнца. Ужо пасля, на падставе атрыманых даных, аказваецца адаптацыйная дапамога дзецям. Адметна, што ажыццяўляецца яна па ўзроставым прынцыпе. Для дзяцей старэйшага і сярэдняга ўзросту арганізоўваюцца трэнінгі, для малых — адаптацыйныя гульні. Да гэтай важнай работы актыўна далучаны’не толькі педагогі, але і бацькі навучэнцаў, для развіцця псіхолага-педагагічных кампетэнцый якіх ладзяцца кансультацыі, рэкамендацыйныя гутаркі. Эфектыўная адаптацыя дзяцей добра ўплывае на напаўняльнасць і разнастайнасць аб’яднанняў па інтарэсах установы. Сёння цэнтр “Юнацтва” наведвае звыш дзвюх тысяч хлопчыкаў і дзяўчынак.
Распрацоўкі, якія былі адзначаны ўзнагародамі на конкурсе, тычыліся розных напрамкаў псіхолага-педагагічнай дзейнасці. Але галоўнае, што ўсе яны накіраваны на аказанне якаснай дапамогі дзецям, якія маюць у ёй патрэбу.