Зігуля, Н. Размова па душах / Нэлі Зігуля // Звязда. — 2023. — 21 кастрычніка. — С. 3.
Спікер верхняй палаты беларускага парламента Наталля КАЧАНАВА абмеркавала з актывам жанчын Магілёўскай вобласці надзённыя праблемы і адказала на пытанні
На сустрэчу са Старшынёй Савета Рэспублікі Нацыянальнага сходу Рэспублікі Беларусь у Магілёў прыехалі жаночыя дэлегацыі з усіх раёнаў вобласці. Амаль тысячу актывістак Беларускага саюза жанчын прынялі ўдзел у размове, якая адбылася ў абласным Палацы культуры. Перад тым як прыступіць да яе, Наталля Качанава азнаёмілася з выставай, прысвечанай сямейнай тэматыцы, пацікавілася ў прадстаўнікоў мясцовай улады лёсам дзяцей, якія засталіся без апекі бацькоў. Ёй паведамілі, што ў вобласці створана 55 дамоў сямейнага тыпу. На сёння налічваецца 3200 сірот.
Наталля Качанава сустрэлася са шматдзетнай сям’ёй Сяргея і Юліі Дубаносаў, выслухала іх расповед пра сябе і свае спадзяванні. Спікер адзначыла, што дзякуючы такім пазітыўным сем’ям і квітнее наша Беларусь.
Пасля гэтага спікер верхняй палаты парламента расказала жаночаму актыву пра асноўныя напрамкі развіцця беларускага грамадства. Закранула тэму работы над законапраектамі, прыпынілася на галоўных пасылах Усебеларускага народнага сходу, рабоце з хворымі дзецьмі і стварэнні для іх спрыяльнага асяроддзя. Выдзеліла актуальную сёння тэму развіцця рэгіёнаў, падкрэсліла важнасць узаемнага даверу паміж грамадствам і дзяржавай, закранула шмат іншых, не менш важных тэм. У адказ ад жанчын прагучалі пытанні агульнага і асабістага плана.
Маладую жанчыну з Быхава цікавіла магчымасць атрымання льготнага крэдыту на пабудову жылля. Наталля Іванаўна падрабязна растлумачыла, хто сёння мае правы на жыллё з ільготнай падтрымкай; нагадала, што шмат чаго залежыць ад таго, колькі метраў жылой плошчы маецца ў наяўнасці ў ахвотнага атрымаць такі крэдыт, аб прыярытэтных кірунках у будаўніцтве арэнднага жылля. Яна паведаміла, што гэта пытанне знаходзіцца ў цэнтры ўвагі і карэкціруецца з улікам заўваг.
З задавальненнем прыняла прапанову ад яшчэ адной прадстаўніцы БСЖ аб стварэнні пастаяннай тэлеперадачы пра паспяховыя сем’і, дзе сваімі меркаваннямі дзяліліся б прафесійныя эксперты і сем’і, якія маюць цікавы і карысны вопыт. Жанчын таксама хвалявала тэма сямейнага капіталу, пенсіённага ўзросту, патрыятычнага выхавання і іншыя.
Журналісты папрасілі Наталлю Качанаву падзяліцца меркаваннем, чым выкліканы такі інтарэс да гэтых сустрэч, бо колькасць ахвотных да іх далучыцца расце.
— Я думаю, таму, што мы сумуем па чалавечых адносінах, — паведаміла яна. — Калі мы разам, можам па-гутарыць на любыя тэмы, якія нас хвалююць, пачуць адно аднаго, задаць пытанні, унесці прапановы. Сустрэчы праходзяць дынамічна і цікава. Я нават сказала б, што гэта не нейкая там інфармацыйная сустрэча, калі ты спрабуеш данесці нешта. А менавіта адносіны, пытанні і прапановы, якія датычацца перадусім таго, чым жывуць сем’і. Гэта і дзіцячая неўладкаванасць, і будаўніцтва жылля. Жанчыны задаюць шмат асабістых пытанняў: напрыклад, іх цікавіць, як можна сумяшчаць высокую адказную пасаду і быць маці, бабуляй. На мой погляд, гэта проста. Спачатку трэба стаць мамай, а потым да цябе прыйдзе ўсё, калі ты маеш сур’ёзную грамадзянскую пазіцыю, адказныя адносіны да сваёй справы, любоў да радзімы, народа. На сустрэчу збіраюцца менавіта такія жанчыны: яны працуюць, займаюцца сям’ёй, яшчэ і жывуць праблемамі нашага грамадства. У выніку атрымліваюцца цікавыя, шчырыя размовы. Напэўна, таму колькасць людзей з кожным разам прырастае, і мы рады. Гэта добрая магчымасць падзяліцца адзін з адным сваімі ўражаннямі, радасцямі, інфармацыяй і гісторыямі.
Наталля Качанава прызнаецца, што сама атрымлівае зарад энергіі і станоўчых эмоцый ад такіх сустрэч. Яны ўзаемна цікавыя, лічыць яна.
— У нас вельмі цудоўныя жанчыны,—рэзюмуе Наталля Іванаўна. — І я вельмі ўдзячная ім за тое, што яны патрыёткі краіны, сем’яў, вытворчасцяў, арганізацый, прадпрыемстваў, дзе працуюць. І гэта прыклад для нас усіх.
Сустрэчы з актывісткамі Беларускага Саюза жанчын адбываюцца пры непасрэдным удзеле старшыні гэтай рэспубліканскай арганізацыі Вольгі ШПІЛЕЎСКАЙ.
— Жанчыны могуць усё, асабліва калі яны аб’ядноўваюцца ў грамадскія суполкі, для іх няма нічога немагчымага, — пераканана яна. — Мы аб’ехалі літаральна ўсю краіну і пераканаліся, што сустрэчы заўсёды праходзяць у вельмі душэўнай, добрай атмасферы. У жанчын ёсць магчымасць наўпрост задаць набалелыя пытанні, закрануць абсалютна любую праблематыку.
І наогул, работа грамадскага аб’яднання накіравана на тое, каб забяспечыць рэалізацыю жанчын па ўсіх кірунках. Няважна, чаго гэта датычыцца: юрыдычнай сферы, сацыяльнай, адукацыі — Беларускі саюз жанчын прадстаўлены сёння ва ўсіх структурах. Таму і задача наша зводзіцца да таго, каб жанчына змагла рэалізавацца. Каб яна ведала, што побач хапае тых, хто можа падставіць плячо.