Габец, Я. У чаканні свята анімацыі / Яўгенія Габец // Культура. — 2024. — 23 жніўня. — С. 5.
Міжнародны фестываль анімацыйных фільмаў “Анімаёўка-2024” пройдзе з 25 па 27 верасня ў Магілёве. Якія новаўвядзенні чакаюць гасцей і ўдзельнікаў форуму, расказала начальнік аддзела рэкламы, сувязі са СМІ і метадычнай работы Магілёўскага дзяржаўнага прадпрыемства “Кінавідэапракат” Вольга Сідаровіч.
ТВОРЦЫ З УСЯГО СВЕТУ
Сёлета фестываль адбудзецца ў 27 раз. Свята анімацыі зарадзілася яшчэ ў 1998-м. Ідэя заснавання “Анімаёўкі” належыць Ігару Волчаку — рэжысёру, які выгадаваў не адно пакаленне майстроў. Спачатку форум праходзіў у Мінску, але ўжо ў наступным годзе пераехаў у Магілёў, дзе атрымаў пастаянную прапіску. Фестываль — пляцоўка для дэманстрацыі і папулярызацыі выбітных дасягненняў сусветнай і айчыннай анімацыі, наладжвання культурных сувязей паміж Беларуссю і іншымі краінамі. Акрамя таго, гэта добрая магчымасць для таленавітых дзяцей і моладзі развіць здольнасці і пазнаёміцца з вядучымі дзеячамі кінамастацтва.
У рамках фестывалю пройдуць тры конкурсы: анімацыйных фільмаў, дзіцячай анімацыйнай творчасці, дзіцячай выяўленчай і дэкаратыўна-прыкладной творчасці. “Анімаёўка” даўно стала значнай падзеяй у культурным жыцці не толькі Беларусі. Форум недарма мае статус міжнароднага: штогод у праграме — работы практычна з усіх кантынентаў. Геаграфія свята пашыраецца з кожным разам. Тут нішто не перашкаджае аўтарам і гледачам паразумецца: мова анімацыі не патрабуе перакладу.
— Сёлетні фестываль ставіць новыя рэкорды. Мы ўжо атрымалі 317 стужак з 47 краін. Упершыню сярод удзельнікаў прадстаўнікі В’етнама, Трынідада і Табага, — паведаміла Вольга Сідаровіч.
Творчасць аніматараў будуць судзіць эксперты з Беларусі, Расіі, Кітая, Казахстана, Сербіі ды Ірана. У журы не толькі рэжысёры, сцэнарысты і мастакі, але і паспяховыя крытыкі, выкладчыкі, дырэктары замежных студый. Такая разнастайнасць забяспечыць аб’ектыўную ацэнку з улікам сучасных патрабаванняў кінарынку.
У НАГУ З ЧАСАМ
У фестывальныя дні, акрамя конкурсных паказаў, адбудуцца творчыя сустрэчы з вядучымі рэжысёрамі Беларусі і замежжа, майстар-класы. Адна з задач “Анімаёўкі” — выхаваць новую змену аніматараў. У Магілёве дзякуючы фестывалю ўжо з’явілася некалькі студый, у якіх дзеці ствараюць уласныя мультфільмы. Прычым паспяхова: яны становяцца пераможцамі не толькі айчыннага конкурсу, але і прэстыжных міжнародных творчых спаборніцтваў.
“Анімаёўка-2024” парадуе прыхільнікаў шэрагам новаўвядзенняў. На конкурсе анімацыйных фільмаў з’явіцца намінацыя “Найлепшы анімацыйны серыял”. У праграме мерапрыемстваў — серыя майстар-класаў з выкарыстаннем штучнага інтэлекту.
— Тэхналогія адкрывае новыя гарызонты, спрашчае працэс аніміравання. Таму мы вырашылі даць старт цыклу майстар-класаў у такім напрамку. Іх правядзе Таццяна Сіманава, AI-аніматар студыі TCL North America, рыгер і layout-мастак студыі Toonbox. Заняткі “Сучасныя анімацыйныя AI-сэрвісы: практычная інструкцыя” разлічаны як на аматараў, так і на тых, хто ўжо мае вопыт у анімацыі. Майстар-клас “Кароткаметражка з AI: ад ідэі да экрана” — на тых, хто хоча паглыбіць веды ў стварэнні анімацыйнага кантэнту пры дапамозе штучнага інтэлекту, — патлумачыла Вольга Сідаровіч.
ДАДАТКОВЫЯ БАЛЫ
Падарункам для юных удзельнікаў і пацвярджэннем высокага статусу фестывалю стала дамова з Маскоўскім дзяржаўным інстытутам культуры. Пры падтрымцы старшыні журы конкурсу дзіцячай анімацыйнай творчасці Сяргея Струсоўскага вучоны савет гэтай ВНУ рашыў, што пераможцы “Анімаёўкі” будуць атрымліваць дадатковыя балы пры паступленні.
Ужо хутка квіткі на фестывальныя мерапрыемствы можна будзе набыць у касах кінатэатраў Магілёва і вобласці, а таксама на сайце Магілёўскага дзяржаўнага прадпрыемства “Кінавідэапракат”.
Яўгенія ГАБЕЦ