Сінькевіч, Г. Навучыць любіць Радзіму / Ганна Сінькевіч // Настаўніцкая газета. — 2024. — 15 лістапада. — С. 9.
Прывіццё дзецям адданасці Айчыне, гордасці за сваю краіну і народ лічыць галоўным у сваёй рабоце кіраўнік па ваенна-патрыятычным выхаванні сярэдняй школы №40 Магілёва Віталь Хадановіч.
Сферай адукацыі і педагогікай Віталь Алегавіч звязаны амаль два з паловай дзесяцігоддзі. Доўгі час ён выкладаў геаграфію, пэўны перыяд быў намеснікам дырэктара. Новы раздзел у яго прафесійнай біяграфіі адкрыла ўвядзенне пасады кіраўніка па ваенна-патрыятычным выхаванні.
— Калі прапанавалі папрацаваць у гэтым кірунку, пагадзіўся не разважаючы. Я перакананы, што настаўніку неабходна як вучыць, так і выхоўваць. У свядомасці моладзі павінны быць не навязаныя звонку, а нашы, традыцыйныя культурныя каштоўнасці. Ваенруку трэба канцэнтраваць сваю дзейнасць менавіта на гэтым. Дапрызыўная падрыхтоўка, знаёмства з вайсковай службай першачарговыя. Але важней навучыць дзяцей любіць Радзіму, — упэўнены Віталь Хадановіч.
Фарміраваць у вучняў патрыятычныя пачуцці Віталь Алегавіч пачынае з моманту іх прыходу ў школу. Выхаваўчай работай ахоплівае дзяцей з 1 па 11 клас. Ён рэгулярна ладзіць для школьнікаў урокі памяці і мужнасці, тэматычныя дыскусіі, круглыя сталы, дыялогавыя пляцоўкі, кіналекторыі.
— Пры правядзенні мерапрыемстваў рэгулярна выкарыстоўваю прынцып «роўны вучыць роўнага». Старэйшыя навучэнцы падтрымліваюць малодшых, дзеляцца вопытам. Такая пераемнасць вельмі патрэбна, бо малышы стараюцца браць са старшакласнікаў прыклад, — паведаміў Віталь Хадановіч.
Па яго меркаванні, ключавое значэнне ў патрыятычным выхаванні адыгрывае і ўзаемадзеянне з бацькамі, бо часта дзіця капіруе тое, што трансліруецца ў сям і.
— Выхаванне патрыёта — складаны працэс, у які павінны быць раўнацэнна ўцягнуты сям’я і школа. Па гэтай прычыне заўсёды знаходжуся ў цеснай сувязі з бацькамі, тлумачу, што ў станаўленні дзіцячай асобы мы з імі паплечнікі. Згуртаванасць прыносіць адпаведныя вынікі: для навучэнцаў любоў да Радзімы не проста словы. Яны з цікавасцю вывучаюць гісторыю роднага краю, ушаноўваюць подзвігі герояў Вялікай Айчыннай вайны. Хлопцы і дзяўчаты актыўна ўдзельнічаюць у нясенні Вахты Памяці ля Вечнага агню. Для іх гэта прывілей і ганаровы рытуал, — расказаў Віталь Алегавіч.
На пастаяннай аснове сумесна з класнымі кіраўнікамі Віталь Хадановіч арганізоўвае для вучняў экскурсіі. Гэта паездкі па памятных мясцінах і прафарыентацыйныя выезды. Школьнікі наведалі мноства мемарыялаў, пабывалі ў шэрагу вайсковых часцей і падраздзяленняў сілавых структур.
— Падчас экскурсій падлеткі наглядна знаёмяцца з армейскімі буднямі. Многіх убачанае натхняе на выбар прафесіі. Але самае галоўнае, што навучэнцы пачынаюць разумець значнасць міру і спакою на роднай зямлі. Асабліва выразна яны ўсведамляюць гэта ля помнікаў ахвярам генацыду ці манументаў баявой славы, — заўважыў Віталь Алегавіч.
Акрамя ваенна-патрыятычнага выхавання, Віталь Хадановіч па-ранейшаму настаўнічае — выкладае навучэнцам асновы бяспекі жыццядзейнасці. Да таго ж педагог прымае ўдзел у дзейнасці савета прафілактыкі школы, вялікую ўвагу ўдзяляе падрыхтоўцы дзяцей да конкурсаў і спаборніцтваў.
— Мае вучні неаднаразова станавіліся пераможцамі гарадскіх этапау вядомых патрыятычных гульняў «Зарнічка» і «Арляня». Нямала ў вучняў і іншых поспехаў. Але для мяне каштоўна тое, што школьны парог навучэнцы пераступаюць дастойнымі грамадзянамі з правільнымі жыццёвымі арыенцірамі, — падкрэсліў Віталь Алегавіч.
Свае прафесійныя прынцыпы Віталь Хадановіч надоечы прадставіў на абласным этапе рэспубліканскага конкурсу прафесійнага майстэрства сярод кіраўнікоў па ваенна-патрыятычным выхаванні. Пры істотнай канкурэнцыі ён стаў пераможцам.
— Гэтае дасягненне — заслуга ўсёй школы. Гадаваць дзяцей патрыётамі імкнецца ўвесь наш педагагічны калектыў, — запэўніў Віталь Алегавіч. — Дасягаць пастаўленых мэт дазваляюць агульная ўцягнутасць і адзіныя падыходы да выхавання.
Пасля маштабнай мадэрнізацыі ў Чавусах адкрылі дзіцячы сад № 5. На капітальны рамонт выдаткавалі звыш 920 тысяч рублёў. У ходзе рэканструкцыі былі цалкам абноўлены дах, фасад, уваходныя групы будынка, пераабсталяваны харчаблок, пральня, музычная зала, сістэма пажарнай сігналізацыі. На прылеглай да сада тэрыторыі зявіліся новыя ценявыя навесы, гульнявыя і спартыўная пляцоўкі. Істотнае перааснашчэнне закранула таксама цэнтр карэкцыйна-развіццёвага навучання і рэабілітацыі, які функцыянуе на базе дашкольнай установы. Адкрыццё сада прайшло ў святочнай атмасферы і стала знакавай падзеяй для жыхароў горада.
Магілёўскія навучэнцы трыумфальна выступілі на заключным этапе алімпіяды школьнікаў Саюзнай дзяржавы “Расія і Беларусь: гістарычная і духоўная еднасць”. Удзельнікамі прэстыжнага інтэлектуальнага спаборніцтва сталі 138 старшакласнікаў з розных гарадоў дзвюх краін.
У ходзе алімпіяды неабходна было напісаць сачыненне і выканаць комплексную работу па рускай мове і літаратуры. Акрамя таго, вучні маглі паказаць сябе ў індывідуальных конкурсах выразнага чытання і рытарычнага майстэрства. Прадстаўнікі Магілёўшчыны заваявалі пяць прызавых дыпломаў , з іх тры — I ступені. У скарбонцы навучэнцаў таксама спецыальны прыз і дыплом за лепшы водгук. Высокія вынікі дазволілі дзецям стаць мераможцамі каманднага заліку. Лідарскія пазіцыі на алімпіядзе Саюзнай дзяржавы вучні рэгіёна займаюць пастаянна. За гэтымі дасягненнямі стаіць карпатлівая праца педагогаў. Значны уклад у падрыхтоўку ўносіць трэнер каманды Галіна Сенакосава, а таксама настаўніцы школ вобласці Анжаліка Склярава, Галіна Бурак, Лідзія Шкурганава, Аксана Кастраміна, Таццяна Касянкова і Валянціна Несцярэнка.
Дзіцячая творчасць пазітыўнай хваляй захліснула днямі Клімавічы. У райцэнтры чарговы раз прайшоў міжнародны фестываль “Залатая пчолка” За сваю шматгадовую гісторыю фэст стаў сапраўдным брэндам клімавіцкай зямлі і набыў шырокую вядомасць далёка за межамі раёна. Папулярнае спаборніцтва аб’ядноўвае дзяцей з розных гарадоў і краін, з’яўляецца пляцоўкай для раскрыцця юных талентаў. Сёлетняя “Залатая пчолка” сабрала разам звыш 380 хлопчыкаў і дзяўчынак з Беларусі, Расіі, Азербайджана, Узбекістана. Для дзяцей былі арганізаваны не толькі конкурсныя выступленні, але і цікавая культурна-асветніцкая праграма. Фінальным акордам фестивалю стаў гала-канцэрт, падчас якога былі названы імёны пераможцаў.
Ганны СІНЬКЕВІЧ