Пачатак вялікіх здзяйсненняў

У мінулым годзе гранты Прэзідэнта Рэспублікі Беларусь былі прызначаны 58 спецыялістам у галіне навукі, адукацыі, аховы здароўя, культуры і маладзёжнай палітыкі. Учора леташнія атрымальнікі грантаў давалі справаздачу аб выніках навуковых даследаванняў. Адначасова на пасяджэнні рэспубліканскай камісіі, якую ўзначаліў намеснік прэм’ер-міністра Беларусі Уладзімір КАРАНІК, былі разгледжаны кандыдатуры, якія вылучаюцца на атрыманне грантаў кіраўніка дзяржавы ў бягучым годзе.

Мерапрыемства прайшло ў Нацыянальнай акадэміі навук. На двух паверхах акадэміі размясцілася традыцыйная выстаўка, дзе былі прадстаўлены прэзентацыйныя справаздачы аб выніках навуковых даследаванняў, праектах у галіне адукацыі і маладзёжнай палітыкі. Віцэ-прэм’ер азнаёміўся з кожным стэндам, выслухаў кожнага спецыяліста. З боку
Уладзіміра Караніка асноўным да іх было пытанне практычнай значнасці і эфектыўнасці даследаванняў, выкананых пры грантавай падтрымцы. Аналізуючы крыху пазней убачанае і пачутае на абароне праектаў, ён падкрэсліў: усё, што адбываецца ў рамках гэтай праграмы на працягу ўжо дзесяці гадоў, варта разглядаць самым сур’ёзным чынам, і адзначыў, што распрацоўка — гэта спроба, першы крок, за якім можа стаяць вялікая будучыня.

— Калі гэта датычыцца медыцыны, то вынік работы — выратаваныя чалавечыя жыцці, захаванае здароўе. Адукацыя — наша будучыня, таму што менавіта ад развіцця нацыі залежыць рух наперад, — сказаў віцэ-прэм’ер. — Калі мы не будзем удзяляць увагу навуцы, мы вельмі хутка акажамся неканкурэнтаздольнымі. Вядома, культура — гэта вельмі важна. Наступныя пакаленні павінны быць не толькі падрыхтаванымі тэхнічна, не толькі быць здаровымі, але і захаваць традыцыі, культурны код нашага народа. І не проста захаваць, а прымножыць і перадаць наступным пакаленням.

Як правіла, прэзідэнцкія гранты выдзяляюцца на даследаванні і распрацоўкі ў розных галінах: ад навукі да сучасных методык, вучэбна-метадычных комплексаў, электронных навучальных дапаможнікаў для павышэння якасці адукацыі навучэнцаў і студэнтаў. Ад стварэння новых метадаў і тэхналогій лячэння пацыентаў, дыягностыкі захворванняў да рэалізацыі творчых праектаў у музычным і тэатральным мастацтве, экспазіцый музеяў і выставак. Большасць праектаў ужо сёння ўкаранёны ў рэальным сектары эканомікі.

Асаблівая ўвага — маладзёжным праектам, мэта якіх — патрыятычнае выхаванне, вывучэнне гістарычнай спадчыны, уцягванне маладых у грамадскае жыццё і павышэнне грамадзянскай актыўнасці. Гэтым разам установы адукацыі прадставілі адразу некалькі цікавых і кранальных праектаў — інклюзіўны праект па стварэнні маштабных мадэляў помнікаў архітэктуры рэгіянальнага і нацыянальнага значэння пры дапамозе 3D-мадэлявання для людзей са слабым зрокам і «Яблыневы сад Перамогі» — гісторыя старога фруктовага саду, які аднавілі школьнікі і напоўнілі яго новым сэнсам і малымі архітэктурнымі формамі, кожная з якіх адлюстроўвае тэму Вялікай Перамогі. Не менш цікавы праект Віцебскага дзяржаўнага ўніверсітэта — «Віртуальны музей маці», які прысвечаны традыцыйным сямейным каштоўнасцям, любові да матулі, роднай хаты, сваёй малой радзімы.

— У нашай краіне навука, сацыяльная сфера заўсёды знаходзяцца ў зоне пільнай увагі. Дадатковая ўвага з боку Прэзідэнта — выдзяленне грантаў па гэтых кірунках — дазваляе падтрымаць маладых таленавітых навукоўцаў і забяспечыць ім фінансаванне і адміністрацыйную падтрымку для ўкаранення распрацовак. Многія інавацыйныя распрацоўкі, выкананыя па грантах, я ўпэўнены, лягуць у аснову вялікіх праектаў, якія дазволяць нам заявіць пра сябе не толькі ў Беларусі, але і на сусветнай арэне. Гэта распрацоўкі ў галіне абароны касмічных апаратаў, сродкаў сувязі, для сістэмы аховы здароўя, павышэння эфектыўнасці аказання медыцынскай дапамогі і многія іншыя, — сказаў Уладзімір Каранік.

Алена ВІНАГРАДАВА

Фота Віктара ІВАНЧЫКАВА