Адкрываю, як свет, нанова

Хлопчыкі і дзяўчынкі з пачатковай школы паспрабавалі адказаць на пытанні віктарыны «У свеце беларускіх казак», праслухалі вершаваную казку «Коцік, Пеўнік і Ліска», пазнаёміліся з добрымі кнігамі і каляровымі часопісамі на беларускай мове.

Шчырыя словы пра беларускую мову, пра яе багацце i прыгажосць прагучалі ў песнях, вершах літаратурна-музычнай кампазіцыі «З любоўю да роднага слова». Навучэнцы 6-га класа чыталі вершы аб роднай мове, з захапленнем слухалі беларускія песні ў выкананні спявачак з дзіцячай школы мастацтваў №5; удзельнічалі ў конкурснай праграме «Пацей, грамацей», дзе хлапчукі спаборнічалі супраць дзяўчынак у розных конкурсах і гульнях. Найбольш за ўсё спадабаўся конкурс «Пазнай фразеалагізм», у якім кожнаму ўдзельніку з дапамогай мімікі і жэстаў трэба было растлумачыць беларускія фразеалагізмы. У канцы мерапрыемства Гаспадыня пачаставала ўсіх сапраўднай беларускай стравай – бульбяной дранкай.

На працягу ўсяго дня ў бібліятэцы гучала беларуская музыка і дзейнічала кніжная выстава «Чытаем па-беларуску. Далучайся і ты!», пры якой можна было паўдзельнічаць у чыт-экспрэсе і атрымаць салодкі падарунак.