Голiкава-Пошка, Я. «Анiмаёўка» — свята для ўсiх / Яўгенiя Голiкава-Пошка // Мастацтва. — 2006. — №7. — С. 30.
Першая «Анiмаёўка» прайшла ў Мінску ў маі 1998 года. Праз два гады Міжнародны фестываль анімацыйных фільмаў змянiў сталічную прапіску i трывала атабарыўся ў Магілёве.
Леташнім вераснем у восьмы раз сабраліся мультыплікатары самых розных анімацыйных студый Масквы, Санкт-Пецярбурга, Мінска, Вільні, Рыгі, Таліна, Екацярынбурга, Ерэвана і Казахстана. Гледачам паказалі больш за 100 мультыплікацыйных стужак.
Лічыцца, што «Анімаёўка» — пераважна дзіцячы фестываль. Пагадзіцца з гэтым цяжка. Хаця б з той прычыны, што няма пакуль на Беларусі любімых дзіцячых анімацыйных персанажаў, як, да прыкладу, Мікі Маус ці Дональд у ЗША. Таму ва ўсіх кінатэатрах Магілёва традыцыйна праводзяцца сустрэчы маленькіх гледачоў са знаёмымі тэлевізійнымі героямі.
Але «Анімаёўка» — насычанае, карыснае свята і для дарослых. Урэшце, анімацыя — не забаўка, а сур’ёзнае і шматграннае мастацтва, разлічанае на рознаўзроставую аўдыторыю.
Галоўная дзея фестывалю, як вядома, — прагляд конкурсных анімацыйных фільмаў.Ён ладзіўся ў гатэлі «Магілёў» і ў цэнтральным гарадскім кінатэатры «Радзіма». У склад журы ўвайшлі кіназнаўца ААрлоў і кампазітар Г.Гладкоў з Масквы, рэжысёры В.Казлоў, В.Мароз і А.Карпаваз Мінска. Пагадзіцеся, справа не з лёгкіх — выбар лепшай стужкі з трыццаці васьмі высокамастацкіх аўтарскіх твораў, што прадстаўляліся для ўдзелу ў фестивальным спаборніцтве.
У выніку дыпломам VIII Міжнароднага фестывалю анімацыйных фільмаў «Анімаёўка-2005» узнагароджаны нашы рэжысёр А.Турава і мастак М.Карпава. Яны стварылі каляровую арыгінальную і прафесійна выкананую мультыплікацыйную стужку-сацыяльную рэкламу «Не жартуйце з агнём». Дыпломам фестывалю ўшанаваны і рэжысёр Ж.Баймулы з Казахстана — за высакаякасны анімацыйны фільм «Высакародная гусь». Расійскі рэжысёр Д.Чарноў атрымаў узнагароду за лепшы маляваны казачны серыял «Смяшарыкі». Рэжысёр Р.Саакянц (Арменія) атрымаў дыплом за лепшы сатырычны мультыплікацыйны фільм «Прыкметы разумнага жыцця», латвійскі рэжысёр Д.Крумінш — за займальную карціну філасофскага накірунку «Шафа», а рэжысёр А.Калпілін з Расіі — за творчую выразнасць мультыплікацыйнай стужкі «Шамбала». Узнагародай адзначана і анімацыйная студыя з Вільні — за надзвычай выразны маляваны фільм «Саліст». Першую ў сваім жыцці ўзнагароду за рслік «Пра кветку» атрымала і магілёўская анімацыйная студыя «Птушаняты» — самыя малодшыя ўдзельнікі фестывалю, сямі-васьмігадовыя творцы.
На жаль, летась беларускія рэжысёры-аніматары не заваявалі ніводнай высокай узнагароды. Тэндэнцыя? Ды не. На «Анімаёўцы-2003» спецпрыз за выкарыстанне новых камп’ютэрных тэхналогій у мультыплікацыі дастаўся стужцы Алены Пяткевіч «Песенька для канарэйкі». А фестываль «Анімаёўка-2004» запомніўся гледачам адразу двума пераможнымі прарывамі. «Крыштальны аловак» у намінацыі «Самы лепшы мультфільм для дзяцей» быў прысуджаны Наталлі Хаткевіч — за арыентаваную на сучасную моладзь карціну «Бегла мышаня па траве». Тады ж рэжысёр-аніматар Ірына Кадзюкова атрымала спецыяльны дыплом фестывалю «За уклад у развіццё беларускай анімацыі». Нельга не адзначыць, што менавіта Кадзюкова стварыла шыкоўны цыкл мультыплікацыйных стужак-перакладак «Калядныя апавяданні», заснаваны на беларускім старадаўнім фальклоры.
Хочацца спадзявацца, што праз нейкі час фестывальныя паказы «Анімаёўкі» будуць ладзіцца не толькі ў Магілёве, але і ў іншых беларускіх гарадах, каб даць магчымасць як мага болынай колькасці гледачоў пазнаёміцца з дасягненнямі нацыянальнай школы анімацыі.