Чарняўская, Дар’я. …Праз інтэрактыў : з гістарычнымі інтрыгамі: [краязнаўчы праект «Прагулкі па Магілёве» дзіцячай бібліятэкі-філіяла імя А С. Пушкіна] / Дар’я Чарняўская // Літаратура і мастацтва. — 2017. — 10 лістапада. — С. 11.
Прапануем найцікавейшыя ідэі для папулярызацыі чытання сярод моладзі, агучаныя на семінары «Дзіцячае чытанне: праблемы, пошукі, рашэнні»:
1. Разам з сябрам чалавека
Наталля Глоза, загадчыца Бібліятэкі сямейнага чытання горада Ламаносава, распавяла, што ў некаторыя дні ганаровым госцем бібліятэкі становіцца… лабрадор. Сабаку (зразумела, выхаванага і прывітага) прыводзяць у залу на сустрэчу з дзецьмі, дзе ён нават сам абірае кнігу, якую будуць чытаць гэтым разам. Лабрадор, падрыхтаваны да такога фармату сустрэч, уважліва слухае маленькіх чытачоў, а пасля гуляе з імі. Заняткі з сабакам вельмі карысныя для павышэння ўзроўню чытання сярод дзяцей: у адрозненне ад дарослых, лабрадор ніколі не робіць заўваг, што дапамагае пачувацца больш вольна і не хвалявацца.
2. У камандзе
Галоўны бібліятэкар Белгарадскай дзіцячай бібліятэкі А. А. Ліханава Алеся Бухал падчас свайго выступу адзначыла поспехі ў прыцягненні да мерапрыемстваў падлеткаў. Замест таго, каб запрашаць іх да сябе, бібліятэка выправілася на «нейтральную» тэрыторыю — у інтэрнэтпрастору. У Белгарадзе арганізуюць адмысловыя web-турніры для вучняў 6 — 9 класаў. Бібліятэкары абіраюць тэму турніру, называюць патрэбную для чытання літаратуру камандам з 15 — 20 чалавек. Пры дапамозе Skype школьнікі абмяркоўваюць творы і спаборнічаюць за перамогу. Падлеткам падабаецца такі фармат узаемадзеяння, бо ён досыць сучасны і цікавы.
3. З гістарычнымі інтрыгамі
У Дзіцячай бібліятэцы-філіяле імя А. С. Пушкіна горада Магілёва шмат увагі надаецца гісторыі роднага краю. Сёлета ладзілі краязнаўчы праект «Прагулкі па Магілёве», прысвечаны 750-годдзю горада. У межах гэтага праекта пашырыліся межы бібліятэкі: на школьных канікулах малодшыя школьнікі ўдзельнічалі ў шэрагу мерапрыемстваў, скіраваных на павышэнне ведаў пра мінуўшчыну і сучаснасць роднага горада. Для моладзі стварылі нават віртуальную пляцоўку, якая дапамагае знаходзіць інфармацыю пра Магілёў за ўласным камп’ютарам. Праект «Дзецям пра Магілёў» арганізаваў у інтэрнэтпрасторы карту Магілёва з тэматычнымі малюнкамі, адкуль дзеці могуць даведацца нешта новае пра гістарычныя аб’екты малой радзімы.