Кухарава, А. Срэбны вынік знаўцы зорак / Алёна Кухарава // Веснік Магілёва. — 2023. — 6 декабря. — С. 21.
Завершылася другая Міжнародная астранамічная алімпіяда (OWAO), якая праходзіла на федэральнай тэрыторыі «Сірыус» (г. Сочы, Расія). Беларусь на спаборніцтвах прадстаўлялі шэсць маладых людзей з розных рэгіёнаў краіны. Уся каманда вярнулася з медалямі, а наш зямляк Кірыл Вусаў заваяваў «срэбра».
Хлопец вучыцца ў 11 класе фізіка-матэматычнага профілю Ліцэя Беларуска-Расійскага ўніверсітэта імя Л.Я. Маневіча. Астраноміяй захапіўся ў 8 класе, а ў мінулым навучальным годзе тады яшчэ дзесяцікласнік заняў першае месца на рэспубліканскім этапе алімпіяды па астраноміі. Прычым спаборнічаў Кірыл не з аднагодкамі, а са школьнікамі, старэйшымі на год. Гэтая акалічнасць дазволіла ліцэісту ўжо ў гэтым годзе ўвайсці ў склад рэспубліканскай зборнай йа міжнародным інтэлектуальным турніры.
На падрыхтоўку ў Кірыла Вусава і яго педагога Аляксандра Сугакевіча быў усяго месяц. Як адзначыў настаўнік, у ліцэі Кірыл — выдатнік, на добрым узроўні ведае англійскую. Гэта спатрэбілася хлопцу на міжнароднай алімпіядзе, бо ўсе заданні, лекцыі і сустрэчы прадугледжвалі свабоднае валоданне гэтай мовай.
Кірыл падзяліўся ўражаннямі ад удзелу ў OWAO:
— Алімпіяда прайшла цудоўна! Восем краін прымалі ўдзел вочна і шэсць дыстанцыйна. Арганізатары падрыхтавалі для нас насычаную праграму з вялікай колькасцю мерапрыемстваў:
мы пабывалі ў Сочынскім парку, наведалі алімпійскія аб’екты, разнастайныя музеі, планетарый, сустракаліся з касманаўтам Дзянісам Мацвеевым. Удалося завесці шмат новых знаёмстваў!
Настаўнік-метадыст Ліцэя Беларуска-Расійскага ўніверсітэта імя Л.Я. Маневіча Аляксандр Сугакевіч выхаваў не адно пакаленне знаўцаў астраноміі.
Вопытны педагог распрацаваў сваю методыку падрыхтоўкі школьнікаў да алімпіяды, якая ўжо шмат год эфектыўна працуе і прыносіць плён.
— У нас у ліцэі існуе адладжаная сістэма падрыхтоўкі алімпіяднікаў па астраноміі. Я лічу, што кожны ліцэіст мае права паспрабаваць, таму ніколі не раблю стаўку толькі на аднаго канкрэтнага вучня. На заняткі запрашаю ўсіх, з часам хтосьці разумее, што гэта не яго, а хтосьці загараецца астраноміяй. У нас вялікая каманда: у гэтым годзе ў абласным этапе рэспубліканскай алімпіяды ад нашага ліцэя будуць браць удзел 11 чалавек. Гэта надзвычай карысна, бо ўсе паміж сабой камунікуюць, дзеляцца ведамі. Сёння на Кірыла малодшыя ліцэісты глядзяць, як на аксакала алімпіяднага руху. А калісьці ён сам толькі пачынаў, прычым прадметам таксама зацікавіўся не адразу, першым на заняткі прыйшоў яго сябар.
«Срэбра» міжнароднай апімпіяды па астраноміі — унікальны вынік для Ліцэя БРУ. Звычайна прадстаўляць краіну на такім узроўні запрашаюць пераможцаў заключнага этапу рэспубліканскай алімпіяды за 11 клас.
I звычайна гэта ўжо першакурснікі розных універсітэтаў краіны. Хтосьці з іх не рызыкуе перарываць навучанне ў ВНУ, а тым, хто пагаджаецца, ужо цяжка састыкаваць графік са школьнымі настаўнікамі. Кірыл жа згуляў на апярэджанне, паказаў выключныя веды яшчэ ў дзясятым класе і атрымаў магчымасць адстойваць гонар краіны на міжнароднай алімпіядзе.