Зiгуля, Н. З удзячнасцю да палкоўніка : [у Магiлёве адкрылi помнiк-бюст палкоўніку С. Куцепаву] / Нэллi Зiгуля // Звязда. — 2016. — 4 лiпеня. — С. 3.
Напярэдадні Дня Незалежнасці ў Магілёве быў адкрыты помнік-бюст палкоўніку Сямёну Куцепаву, камандзіру 388-га стралковага палка 172-й стралковай дывізіі, легендарнаму абаронцу Магілёва.
Ён вядомы кожнаму, хто аднойчы гартаў старонкі рамана Канстанціна Сіманава «Жывыя і мёртвыя» або глядзеў аднайменны фільм. Гэта яго байцы падбілі на Буйніцкім полі пад Магілёвам 39 нямецкіх танкаў, здымкі якіх потым абляцелі на старонках газеты «Известия» ўвесь Савецкі Саюз. Падзеі на гэтым полі ў гарачым ліпені 41-га ляглі ў аснову знакамітай трылогіі, а палкоўнік Куцепаў стаў правобразам камбрыга Сярпіліна.
Размовы пра тое, што помнік вось-вось павінен з’явіцца, у Магілёве ішлі даўно. Гэтага чакаў і сын палкоўніка Уладзімір, які неаднаразова прыязджаў у Магілёў. Не дачакаўся. Яго не стала 2 гады таму. На ўрачыстае мерапрыемства прыехала яго жонка Святлана Куцепава. Каб пакласці каля помніка кветкі ад імя свайго мужа. Сімвалічна, што помнік стаіць якраз на перакрыжаванні вуліцы Куцепава з вуліцай Сіманава. Яны і тут аказаліся побач. У гонар адкрыцця помніка прагучаў трохкратны ружэйны салют, а вялікая колькасць людзей, якія прыйшлі на ўрачысты мітынг, схілілі галовы падчас хвіліны маўчання.
— Абарона Магілёва ў ліпені 41-га ўпісана асобнай главой у ваенны летапіс, — звярнуўся да прысутных старшыня Магілёўскага гарвыканкама Уладзімір Цумараў. — Яна развеяла міф аб непераможнасці нямецкай арміі, стала Дняпроўскім рубяжом і мела вялікае значэнне для далейшага ходу вайны. Абарона Магілёва была першай кругавой абаронай у Вялікай Айчыннай вайне і працягвалася 23 дні. Воіны 388-га стралковага палка праявілі цуды гераізму і стойкасці, доблесці і самаахвярнасці. Камандзір 388-га стралковага палка 172-й стралковай дывізіі Сямён Куцепаў за абарончыя баі пад Магілёвам у жніўні 1941-га быў узнагароджаны ордэнам Чырвонага Сцяга. Некалькі гадоў таму каля будынка Белдзяржстраха на вуліцы Чалюскінцаў быў адкрыты помнік-бюст арганізатару абароны горада, камандзіру 172-й стралковай дывізіі генерал-маёру Міхаілу Раманаву. Цяпер на вуліцы, якая носіць імя Куцепава, усталяваны помнік палкоўніку-герою. Работа па ўвекавечанні памяці абаронцаў горада ў гады Вялікай Айчыннай вайны будзе працягвацца.
Са словамі ўдзячнасці да ветэранаў і магіляўчан звярнуўся намеснік старшыні Тульскай гарадской Думы Алег Суханаў. Ён падзякаваў за тое, што ў Беларусі шануюць традыцыі, працуюць з моладдзю, адкрываюць помнікі нашым гераічным бацькам і дзядам. Кветкі да помніка ўсклала саветнік Пасольства Расіі ў Беларусі Маргарыта Навадворская, прадстаўнікі дэлегацыі горада Тулы, ветэраны, моладзь, прадстаўнікі працоўных калектываў, грамадскасці.